Янгиланган CarPlay Android Auto’га ўхшаб қолди

Apple томонидан яқинда чиқарилган iOS 18.4 янгиланиши CarPlay тизимида катта муаммолар келтириб чиқарди, деб хабар берди pepelac.news. Илгари барқарор ва ишончли деб ҳисобланган CarPlay энди Android Auto’ни эслатадиган беқарор тизимга айланди.

Фойдаланувчилар CarPlay’нинг ўчиб қолиши, уланишни умуман амалга оширмаслик ва айниқса симсиз уланишда катта муаммоларни бошдан кечиришмоқда. Apple бу муаммоларни ҳал қилиш учун iOS 18.4.1 янгиланишини чиқарди, лекин фойдаланувчиларнинг айтишича, ҳолат янада ёмонлашган.

Reddit каби форумларда одамлар дастурни қайта ўрнатиш, телефонни қайта ишга тушириш каби барча ечимларни синаб кўрганларини, лекин ҳеч бири ёрдам бермаганини таъкидлашмоқда. CarPlay энди айрим автомобиль мультимедиа тизимларида умуман ишламайди.

Apple ҳозирча расмий муносабат билдиргани йўқ. Мутахассислар симсиздан кўра симли уланишни тавсия қилмоқда. Шу билан бирга, автомобилнинг мультимедиа тизимига ҳам янгиланишлар киритилганини текшириш керак.

Apple яқин келажакда янги янгиланиш устида ишламоқда, лекин унда CarPlay учун тўғрилашлар бўладими — ҳозирча ноаниқ. «Замин»ни Telegram’да ўқинг!