Конимех чўлларида инновация: Ўзбекистонда илк бор сунъий ёмғир ёғдирилди

Ўзбекистонда иқлим муаммоларига қарши курашишда янги технологиядан фойдаланилмоқда. Навоий вилоятининг Конимех туманида илк маротаба ёмғир сунъий равишда ёғдириш амалиёти амалга оширилди. Бу ҳақда Қозоғистоннинг “Kazinform” ахборот агентлиги хабар берди.

Маълумотларга кўра, туман ҳокимлиги ташаббуси билан атмосферадаги булут ҳосил бўлиш жараёнини рағбатлантириш ва ёғингарчиликни кўпайтириш мақсадида махсус замонавий ускуналар тумандаги яйлов ҳудудларига олиб келинди. Бу технология атмосферага химик моддалар тарқатиш орқали булутларнинг ёмғир ҳосил қилиш қобилиятини оширишга қаратилган.

Ушбу инновацион лойиҳа Қозоғистоннинг International Centre of Climate Change Technologies (ICCCT) компанияси билан ҳамкорликда амалга оширилмоқда. Ташкилот ва маҳаллий ҳокимият ўртасида имзоланган келишув асосида, Конимехдаги қурғоқчиликка мойил бўлган чўл ҳудудларда ёмғир ёғдириш тажрибаси ўтказилмоқда.

Лойиҳа доирасида ўрнатилган ускуналар замонавий метеотаҳлил ва моделлаш орқали ишлайди. Ҳаводаги намлик, ҳарорат ва шамол йўналиши каби кўрсаткичлар ҳисобга олиниб, махсус самолёт ёки қурилма ёрдамида булутларга таъсир кўрсатилади.

Мутахассисларнинг таъкидлашича, мазкур технология АҚШ, Хитой, Бирлашган Араб Амирликлари, Саудия Арабистони каби давлатларда самарали қўлланмоқда. Энди эса Ўзбекистонда ҳам чорвачиликни ривожлантириш, яйловлар ҳолатини яхшилаш, энг муҳими, қурғоқчиликнинг салбий оқибатларини юмшатиш мақсадида ушбу тажриба кенг миқёсда синовдан ўтказилади.

Конимех тумани ҳокимлиги ва иқлим технологиялари маркази вакиллари лойиҳа доирасидаги илк натижалардан мамнун эканини маълум қилишган. Агар тажриба муваффақиятли якун топса, мазкур технология Навоий вилоятининг бошқа ҳудудларида ҳам жорий қилиниши мумкин.

Шу тариқа, сунъий ёмғир ёғдириш – Ўзбекистонда табиий сув ресурслари тақчиллигини юмшатиш, чорва ва қишлоқ хўжалигини қўллаб-қувватлаш йўлидаги янги қадам бўлмоқда. Яқин йилларда бу каби технологиялар кенг миқёсда жорий этилиб, мамлакатдаги иқлимга мос агросаноат ислоҳотларининг муҳим қисмига айланиши кутилмоқда. «Замин»ни Telegram’да ўқинг!