Қоидани бузган АҚШ мудофаа вазири уни койиган ҳарбийга нима учун медаль берди?

АҚШ мудофаа вазири Пит Хегсет Арлингтон миллий қабристонидаги Номаълум аскар қабри олдида ўзига ва шерикларига танбеҳ берган аскар — мутахассис Томас Иглесиасга «Қўшма хизматлари учун» медалини топширди. Бу ҳақда хабарлар жамоатчилик ва ижтимоий тармоқларда катта қизиқиш уйғотди.

Можаронинг келиб чиқиш сабаби

Воқеа 11 ноябрь куни Ҳарбий хизматни ўтаганлар куни муносабати билан Арлингтон қабристонида ўтказилган маросимдан кейин содир бўлган.

Маълум бўлишича, Пит Хегсет, унинг турмуш ўртоғи ва маслаҳатчилари Номаълум аскар қабри қаршисида суратга тушаётганда кулиб, баланд овозда гаплашишган. Бу эса муқаддас қадамжо қоидаларига зид эди.

Шу пайт фахрий қоровул сифатида хизмат қилаётган аскар Томас Иглесиас ўз пост тўхташини қилиб, уларга қараб:

«Барча ташриф буюрувчилар ҳар доим сукут ва ҳурмат муҳитини сақлашлари шарт!» деб баланд овозда танбеҳ берган.

Пентагондаги кутилмаган мукофотлаш

Орадан бир кун ўтиб, 12 ноябрь куни Пит Хегсет Иглесиас ва унинг бўлинмасини Пентагонга таклиф қилди ва уни юқори хизматлари ҳамда стандартларга содиқлиги учун медаль билан мукофотлади.

Мудофаа вазири ўз ижтимоий тармоқдаги саҳифасида қуйидагича изоҳ қолдирди:

• «Аскарларни яхши кўрамиз. Стандартларни яхши кўрамиз. Баракалла, мутахассис!»

Пентагон вакиллари ҳам ўз навбатида аскарнинг талаби тўғри бўлганини ва у ҳарбий интизом ҳамда қабр сукунатини қатъий ҳимоя қилганини билдиришди.

Сизнингча, юқори лавозимли амалдорлар ҳам оддий фуқаролар каби барча умумий қоидаларга сўзсиз амал қилиши шартми? Ўз фикрингизни изоҳларда қолдиринг!