Сбер компаниясининг ГигаЧат нейротармоғи энергетика бўйича имтиҳондан ўтди

Сбер компанияси ўзининг сунъий интеллект модели бўлган ГигаЧат янги ютуққа эришганини маълум қилди. Нейротармоқ Москва энергетика институтида (НИУ МЕИ) "Электроэнергетика" ва "Иссиқлик энергетикаси" йўналишлари бўйича академик аттестациядан муваффақиятли ўтиб, "яхши" баҳосини олди. Бу Россияда ишлаб чиқилган ва бир вақтнинг ўзида бир нечта муҳандислик мутахассисликлари бўйича имтиҳон топширган илк тил моделидир. Бу ҳақда Ixbt.com хабар беради.

Имтиҳон жараёни Сбер мутахассислари, НИУ МЕИ олимлари ва "Россети" компанияси экспертлари томонидан ташкил этилди. Университет катта тил моделларини баҳолаш учун махсус бенчмарк ишлаб чиқди. Жами 24 та фан бўйича ўтказилган синовларда ГигаЧат муҳандислик ҳисоб-китоблари, меъёрий-ҳуқуқий базалар ва энергетика иқтисодиёти соҳаларидаги билимларини намойиш этди.

Ушбу ютуқ нейротармоқнинг келажакда муҳандислар, лойиҳачилар, талабалар ва энергетика корхоналари мутахассислари учун фойдали воситага айланишини англатади. ГигаЧат аввалроқ тиббиёт, мусиқа назарияси, молия ва қурилиш каби 20 дан ортиқ йўналишларда ўз билимини синовдан ўтказган. Шунингдек, модел халқаро молиявий таҳлилчи сертификатини олиш учун зарур бўлган ўтиш баллидан 10 фоизга юқори натижа кўрсатган.