Elon Muskнинг OpenAI компаниясини судга бериши сунъий интеллект соҳасидаги хавфсизлик масалаларини жиддий текширув остига қўйди. Окленддаги федерал судда собиқ ходим ва директорлар кенгаши аъзоси Рози Кемпбелл компания ўзининг дастлабки миссияси бўлган инсоният манфаатларини кўзлашдан кўра, маҳсулотларни бозорга чиқаришга кўпроқ эътибор қаратаётганини таъкидлади. Бу ҳақда Techcrunch.com хабар беради.
Кемпбеллнинг сўзларига кўра, 2021-йилда компанияга қўшилганида у ерда тадқиқот ва хавфсизлик масалалари устувор эди, бироқ вақт ўтиши билан ташкилот маҳсулотга йўналтирилган тузилмага айланди. Хусусан, Microsoft томонидан GPT-4 моделининг Ҳиндистонда хавфсизлик кенгаши рухсатисиз ишга туширилиши хавфсизлик жараёнларига риоя қилинмаётганидан далолат беради.
Суд жараёнида, шунингдек, OpenAI бош директори Сем Алтман ва директорлар кенгаши ўртасидаги зиддиятлар ҳам муҳокама қилинди. Таша Макколи каби собиқ кенгаш аъзолари Алтман кенгашни чалғитгани ва ChatGPT ишга туширилиши ҳақида етарлича маълумот бермагани каби жиддий айбловларни илгари суришди.
OpenAI вакиллари эса компаниянинг хавфсизлик ёндашуви бошқа рақобатчиларга, жумладан, Муск асос солган хAI компаниясига қараганда анча шаффоф ва самарали эканлигини таъкидлашмоқда. Ҳозирда компания сунъий интеллект тайёргарлиги бўйича янги мутахассисларни жалб қилиб, ўз хавфсизлик тизимини қайта кўриб чиқишга ҳаракат қилмоқда.
“Zamin”ни Telegram'да ўқинг!
