Швециянинг Пит стартапи ижтимоий тармоқлардаги шов-шувли постлари билан эътиборни тортган бўлса-да, бугунги кунда Стокголмдаги энг истиқболли сунъий интеллект лойиҳаларидан бирига айланиб улгурди. Компания Вои скутерлар хизмати асосчилари, жумладан Фредрик Ҳжелм ҳамда иЗеттле ва Кларна компанияларининг собиқ муҳандислари томонидан бошқарилади. Лойиҳа a16z венчур фондидан 16 миллион доллар миқдорида сармоя жалб қилди. Бу ҳақда Techcrunch.com хабар беради.
Пит компанияси корпоратив мижозлар учун махсус дастурий таъминот яратиш ва бизнес жараёнларини автоматлаштиришга ихтисослашган. Компания бош директори Адам Жафернинг сўзларига кўра, замонавий сунъий интеллект моделлари шунчаки матн яратувчи чатботлар даражасидан ўтиб, амалий вазифаларни бажара оладиган агентларга айлангани лойиҳанинг асосий турткиси бўлди. Пит ўзини оддий дастурий восита эмас, балки "хизмат кўрсатувчи сунъий интеллект жамоаси" сифатида намоён этади.
Стартап икки асосий йўналишда ишлайди: Пит Студио ва Пит Cloud. Пит Студио ходимларга сунъий интеллект ёрдамида жараёнларни бошқариш имконини берса, Пит Cloud корпоратив стандартлар, хавфсизлик ва аудит талабларига жавоб берадиган дастурий муҳитни тақдим этади. Ҳозирда компания телекоммуникация, соғлиқни сақлаш ва логистика соҳаларидаги мижозлар билан ички жараёнларни автоматлаштириш бўйича синовларни ўтказмоқда.
Адам Жафернинг таъкидлашича, Пит иш ўринларини қисқартиришни эмас, балки ходимларни зерикарли ва такрорланувчи офис ишларидан озод қилиб, уларни бизнес учун кўпроқ қиймат келтирадиган вазифаларга йўналтиришни мақсад қилган. Компания ўз мижозларига натижа кафолатлаш учун махсус муҳандисларни жалб қилмоқда ва сунъий интеллект имкониятларидан фойдаланган ҳолда иш унумдорлигини оширишга интилмоқда.
“Zamin”ни Telegram'да ўқинг!
