Uber сармояси билан ривожланаётган электр велосипед ва скутерлар ижараси хизмати — Лиме компанияси оммавий акциялар савдосига (ИПО) чиқиш учун ҳужжатларни топширди. Неутрон Ҳолдингс Инк. номи остида фаолият юритувчи компания узоқ вақтдан буён фонд бозорига киришни режалаштириб келаётган эди. Бош директор Вайне Тингнинг сўзларига кўра, компания ўзининг молиявий кўрсаткичлари ва ўсиш суръатлари билан оммавий бозорга тайёр. Бу ҳақда Techcrunch.com хабар беради.
Компания Насдақ биржасида "ЛИМE" белгиси остида рўйхатдан ўтишни ният қилган. АҚШ Қимматли қоғозлар ва биржалар комиссиясига тақдим этилган ҳисоботга кўра, Лиме даромадлари барқарор ўсиб бормоқда. Хусусан, 2025-йилда компания 886,7 миллион доллар даромад кўрган. Гарчи соф фойда ҳали қайд этилмаган бўлса-да, компаниянинг эркин пул оқими 2025-йилда 104 миллион долларни ташкил этиб, сезиларли даражада яхшиланган.
2017-йилда ташкил этилган Лиме компанияси Uber билан яқин ҳамкорлик алоқаларига эга. 2020-йилда Uber компаниянинг 170 миллион долларлик инвестиция босқичига етакчилик қилган эди. Ушбу келишув доирасида Лиме Uber'нинг Жумп бўлинмасини ўз таркибига қўшиб олган. Бугунги кунда Лиме хизматлари 29 мамлакатнинг 230 та шаҳрида мавжуд.
Лиме ва Uber ўртасидаги ҳамкорлик компания ривожланишида муҳим омил бўлиб қолмоқда. Фойдаланувчилар Лиме скутерлари ва велосипедларини тўғридан-тўғри Uber иловаси орқали ижарага олишлари мумкин. SEК ҳужжатларига кўра, ўтган йили Лиме умумий даромадининг қарийб 14,3 фоизи айнан Uber билан бўлган ҳамкорлик ҳиссасига тўғри келган.
“Zamin”ни Telegram'да ўқинг!
