Техас штатининг Хилл округи кенгаши қишлоқ ҳудудларида маълумотлар марказлари (дата-сентер) қурилишини бир йилга тақиқлаш бўйича овоз берди. Бу қарор маҳаллий аҳолининг сунъий интеллект инфратузилмаси туфайли ҳудуд инфратузилмаси ва турмуш сифати ёмонлашаётганидан норозилиги ортидан қабул қилинди. Техас одатда арзон энергия ва қулай тартибга солиш тизими туфайли бундай лойиҳалар учун энг мақбул жой ҳисобланади. Бу ҳақда Ixbt.com хабар беради.
Мораторийга Proвидент Дата Сентерс компаниясининг Хиллсборо шаҳри яқинида режалаштирган йирик лойиҳаси сабаб бўлди. Шаҳар юрисдикциясидан ташқарида жойлашган ҳудудларда лойиҳаларни тасдиқлаш жараёни осонроқ кечади, бу эса йирик технологик операторларни ўзига жалб қилмоқда. Бироқ, аҳоли электр энергияси тарифларининг ошиши, тармоққа тушадиган ортиқча юклама ва шовқин каби муаммолардан хавотирда.
Округ вакиллари сунъий интеллект инфратузилмаси ривожи маҳаллий органларнинг назорат имкониятларидан тезроқ кетаётганини тан олишди. Комиссар Жим Холкомб компаниялар Техасдаги назорат суст бўлган ҳудудлардан "идеал бўшлиқ" сифатида фойдаланаётганини таъкидлади. Ҳозирда округ ушбу объектларнинг энергетика ва экологияга таъсирини чуқурроқ ўрганиш учун танаффус қилмоқда.
Ушбу қарор ҳуқуқий баҳсларга ҳам сабаб бўлмоқда. Округ прокурори ва штат сенатори Пол Беттенкурт мораторийнинг қонунийлигини текширишни талаб қилмоқда. Бу ҳолат бутун АҚШ бўйлаб сунъий интеллект буми фонида инфратузилма етишмовчилиги ва энергия қувватлари танқислиги қанчалик жиддий муаммога айланганини кўрсатади.
“Zamin”ни Telegram'да ўқинг!
