Бугунги кунда технология саноатида ўзига хос тартибсизлик кузатилмоқда. Бу ҳолат булутли ҳисоблаш давридаги харажатларнинг кескин ошишини эслатса-да, рекорд даражадаги даромадлар фонида оммавий ишдан бўшатишлар юз бераётгани билан аввалгиларидан фарқ қилади. Саноатда пайдо бўлган янги назарияга кўра, йирик компания раҳбарлари, айниқса бош директорлар (CEO), сунъий интеллект туфайли юзага келган улуғворлик васвасасидан азият чекмоқда. Бу ҳақда Techcrunch.com хабар беради.
Бох асосчиси Аарон Левие ушбу ҳодисани очиқчасига "AI психози" деб атади. Унинг фикрича, раҳбарлар сунъий интеллект ёрдамида қиймат яратиш учун зарур бўлган реал иш жараёнларидан жуда узоқлашиб кетган. Левие Х ижтимоий тармоғида ёзишича, CEOлар AI билан шунчаки "ўйнашади", прототип яратишади ёки шартнома матнини генерация қилишади ва шундан сўнг барча ишларни агентлар бажара олади деган нотўғри хулосага келишади.
Аслида эса, юқори бўғин раҳбарлари дастурий таъминотни ишга туширишдан олдин кодни текшириш, хатоларни топиш ёки AI томонидан ўйлаб топилган (галлюсинация) кутубхоналарни аниқлаш билан шуғулланмайди. Улар компаниянинг ўзига хос шартнома шартларини AI моделларига ўргатиш масъулиятини ҳам ўз бўйнига олмайди. Левиенинг назариясига кўра, раҳбарлар қайси жараёнларни автоматлаштириш мумкин-у, қайсиларини йўқлигини тушуниш учун етарли билимга эга эмаслар.
Шуни таъкидлаш керакки, Левие сунъий интеллектга қарши эмас. Аксинча, у ўзининг 2,7 миллион кузатувчисига AI келажаги ҳақида ижобий постлар улашади ва кўплаб стартапларга сармоя киритади. Унинг маслаҳати шуки, раҳбарлар AI имкониятларини ҳақиқатда тушуниш учун ундан жуда кўп фойдаланишлари ва ҳам ижобий томонларини, ҳам реал меҳнат талаб қиладиган жиҳатларини кўра билишлари керак.
“Zamin”ни Telegram'да ўқинг!
