Фастфуд ичакни сустлаштиради: Икки кунда зарар бошланади

Австралиялик олимлар инсонлар томонидан кенг истеъмол қилинаётган фастфуд — яъни юқори ёғли ва қандли маҳсулотлар ичакнинг табиий ҳимоя тизимига жиддий таъсир кўрсатишини аниқлашди. Бу ҳақдаги илмий хулосалар “Immunity” журналида чоп этилди.

Мазкур тадқиқотда сичқонлар устида олиб борилган тажриба шунга олиб келдики: фақат икки кун ичида юқори ёғли рационга ўтказилган ҳайвонларда IL-22 деб номланган оқсил даражаси пасайиб кетган. Бу оқсил тўқималарни қайта тиклаш ва ичак шиллиқ қаватини ҳимоя қилишда муҳим рол ўйнайди.

Сичқонлар ташқи жиҳатдан мутлақо соғлом кўринганига қарамай, уларнинг ичак деворлари қалинлашган, тўқималарда эса яллиғланиш белгиси бўлган иммун ҳужайралар тўплангани аниқланган. Олимлар буни “ичкарида бошланган суст, лекин хавфли муаммо” деб баҳолашди.

Ушбу ҳолат инсон организми учун ҳам ўта долзарб. Фастфуд ва шунга ўхшаш маҳсулотлар оз вақтда анча кучли таъсир кўрсатиб, саломатликка зарар етказиши мумкин. Илмий жиҳатдан исботланган бу ҳолат узоқ муддатли сурункали яллиғланишларга ҳам олиб келиши мумкин.

Олимлар шундай хулосага келишдики, агар инсон тўйинган ёғларнинг (масалан, фритюрда қовурилган маҳсулотлар) ўрнига тўйинмаган ёғлар (авокадо, зиғир ёғи, ёнғоқ) билан озиқланса, ичакнинг ҳимоя тўсиқлари тикланади ва яллиғланиш хавфи пасаяди.

Zamin.uz таҳририяти фастфуд ва унинг оқибатлари ҳақида илмий янгиликларни кузатишда давом этади. Сиз ҳар куни истеъмол қиладиган овқатлар саломатлигингизга қандай таъсир қилаётганини кузатяпмисиз? Танлов сизнинг қўлингизда. «Замин»ни Telegram’да ўқинг!