Avtomobil ishlab chiqaruvchisi va distribyutori Rossiya bozorida "Peugeot" markasining ikkita yangi sedani narxlarini e'lon qildi. "Peugeot 408" va "Peugeot 508L" modellari faqat bittadan komplektatsiyada taqdim etiladi. Bu haqda Ixbt.com xabar beradi.
Baza modeli hisoblangan "Peugeot 408" avtomobili "Sharm" versiyasida chegirmalarsiz 3 799 000 rubl narxda taklif qilinmoqda. Mashina 173 ot kuchiga ega 1,5 litrli turbomotor va 6 pog'onali avtomat uzatmalar qutisi bilan jihozlangan.
Ushbu model 6 ta xavfsizlik yostig'i, shinalar bosimini nazorat qilish tizimi, panoramali ko'rinish va 10 dyuymli ekranli multimedia tizimiga ega. Avtomobil saloni sun'iy charm bilan qoplangan.
Flagman hisoblangan "Peugeot 508L" modeli "Prestij" versiyasida 4 699 000 rublga baholandi. U 211 ot kuchiga ega 1,8 litrli turbomotor va 8 pog'onali avtomat uzatmalar qutisi bilan ta'minlangan.
Ushbu model jihozlari qatoriga tungi ko'rish tizimi, adaptiv kruiz-nazorat, 4 ta kamera, adaptiv osma va uch zonali iqlim nazorati kiritilgan.
“Zamin”ni Telegramʻda oʻqing!
