GAC kompaniyasi joriy yilning yozida Rossiya bozorida o‘zining yangi yirik krossoveri — GAC S9 modelini taqdim etishni rejalashtirmoqda. Ushbu avtomobil Li Auto L9 modeliga asosiy raqobatchi sifatida ko‘rilmoqda. Kompaniya matbuot xizmatining xabar berishicha, Rossiyada model faqat besh o‘rinli versiyada sotuvga chiqariladi, garchi Xitoy bozorida uning uch qatorli o‘rindiqlarga ega varianti ham mavjud bo‘lsa-da. Bu haqda Ixbt.com xabar beradi.
GAC S9 savdolari 2026-yilning iyun oyida boshlanishi kutilmoqda. Hozircha Rossiya bozori uchun mo‘ljallangan versiyaning texnik ko‘rsatkichlari rasman oshkor etilmadi. Biroq, Xitoydagi model 500 ot kuchiga ega gibrid tizim bilan jihozlangan bo‘lib, u sof elektr energiyasida 252 kilometrgacha masofani bosib o‘tish imkonini beradi. Rossiyaga ham aynan shu kuch agregati yetkazib berilishi ehtimoli yuqori.
Yangi flagman krossover ikki rangli kuzov, 21 dyuymli g‘ildirak disklari, panoramali tom hamda katta ekranga ega zamonaviy media tizim bilan jihozlanadi. GAC S9 brendning Rossiyadagi eng yuqori darajadagi modeli bo‘lishi kutilmoqda.
Avtomobilning narxi hozircha e’lon qilinmagan, ammo u hozirda sotuvda bo‘lgan S7 modelidan qimmatroq bo‘lishi aniq. Eslatib o‘tamiz, GAC avtomobillariga Rossiyada 5 yillik rasmiy kafolat taqdim etiladi.
“Zamin”ni Telegramʻda oʻqing!
