«Rossiya o‘ldirmoqda, Amerika qutqarmoqda» — Olena Zelenskaya AQSH Kongressida nutq so‘zlab, ko‘proq qurol so‘radi

^{Foto: Reuters}
Ukrainaning birinchi xonimi Olena Zelenskaya AQSH Kongressida nutq so‘zladi. U nutqi avvalida bu Amerika kongressida boshqa mamlakat prezidenti rafiqasining ilk bor so‘zga chiqishi ekanini ta’kidlab o‘tdi.

«Odatda, prezidentlarning rafiqalari faqat tinchlik ishlari bilan shug‘ullanadi – ta’lim, inson huquqlari, teng imkoniyatlar kabi. Ammo mamlakatimga qarshi hech qanday sababsiz terrorchilik urushi ketayotgan bir paytda, yuqoridagilar haqda qanday gapirishim mumkin?» — dedi Zelenskaya.

^{Foto: Reuters}
Vladimir Zelenskiyning rafiqasi AQSH parlamenti a’zolariga Rossiya raketasidan halok bo‘lgan vinnitsalik to‘rt yoshli Lizaning suratlarini ko‘rsatdi. U, shuningdek, Rossiya bosqinidan jabrlangan yana bir qancha ukrainalik oilalar haqida gapirdi.

«Bu urush yana qancha oilalarni vayron qiladi? Bu Rossiyaning ochko‘zlik o‘yinlari. Ukrainaning tinch shaharlarida tinch aholini ov qilish», — dedi u.

Zelenskaya AQSHga ko‘rsatayotgan yordami uchun minnatdorlik bildiradi. «Qo‘shma Shtatlar umumiy qadriyatlarimiz, hayotimiz va mustaqilligimiz uchun kurashda biz bilan birga ekanidan juda minnatdormiz. Rossiya o‘ldirmoqda, Amerika qutqarmoqda», — dedi u va Kongressdan qurol yetkazib berishda davom etishni so‘radi.

«Qurol begona yurtga hujum qilish uchun emas, balki o‘z uyingizni himoya qilish va unda tirik uyg‘onishni ta’minlash uchun zarur», — dedi Ukraina birinchi xonimi.

Ukraina prezidentining rafiqasi Olena Zelenskaya 19 iyul kuni AQSHga rasmiy tashrif bilan keldi. U AQSH prezidenti Jo Bayden va uning rafiqasi Jill, AQSH Davlat kotibi Entoni Blinken bilan uchrashdi.

20 iyul kuni AQSH barcha ukrainaliklarni Dissident Human Rights Award mukofoti bilan taqdirladi. Marosim Vashingtondagi Kommunizm qurbonlari yodgorligida bo‘lib o‘tdi. Mukofotni butun ukrain xalqi nomidan Olena Zelenskaya qabul qilib oldi.

Zelenskaya Ukraina hukumatida hech qanday rasmiy lavozimga ega emas, ammo urushning to‘rt oyi davomida siyosatchilar, jamoat tashkilotlari va jurnalistlar bilan o‘z darajasida muloqot olib bormoqda. “Zamin” yangiliklarini “Youtube”da kuzatib boring