BMT Tog‘li Qorabog‘da qolgan armanlar sonini ma’lum qildi

^{Foto: David Ghahramanyan/Reuters}

BMT missiyasining 2 oktyabr kuni e’lon qilingan hisobotiga ko‘ra, Tog‘li Qorabog‘da Ozarboyjonning harbiy amaliyoti va tan olinmagan respublika aholisining ommaviy migratsiyasidan keyin 1000 dan ortiq etnik armanlar qolmoqda. «Jamoa suhbatdoshlaridan Qorabog‘ hududida 50 dan 1000 gacha etnik armanlar qolganini eshitdi», deyiladi hujjatda. BMTning Ozarboyjondagi doimiy koordinatori Vladanka Andreyeva boshchiligidagi missiya 1 oktyabr kuni Qorabog‘ga 30 yil ichida ilk bor tashrif buyurdi.

BMT xodimlari Agdamdan Stepanakertgacha borgan. Qayd etilishicha, Stepanakertning ular borgan qismlarida fuqarolik infratuzilmasi, jumladan, shifoxonalar, maktablar va turar joy binolari, madaniy va diniy obidalarga hech qanday zarar yetkazilmagani aniqlandi. Birlashgan Millatlar Tashkiloti rasmiylariga otashkesimdan buyon tinch aholiga nisbatan zo‘ravonlik holatlari haqida hech qanday xabar kelmadi.

3 oktyabr kuni Armaniston bosh vaziri Nikol Pashinyan matbuot kotibi Nazeli Bagdasaryan mamlakatga Tog‘li Qorabog‘dan 100 625 etnik arman kirib kelganini ma’lum qildi. Mojaro boshlanishidan oldin respublika aholisi 120 ming kishiga baholangan edi.

Tog‘li Qorabog‘ sobiq rahbarlarining qo‘lga olinishi

Bokuning Tog‘li Qorabog‘da «konstitutsiyaviy tuzumni tiklash bo‘yicha» harbiy operatsiyasi 19 sentyabrda boshlandi. Ertasi kuni o‘t ochishni to‘xtatish bo‘yicha kelishuvga erishildi va 28 sentyabrda tan olinmagan Tog‘li Qorabog‘ Respublikasi «prezidenti» Samvel Shahramanyan 2024 yil 1 yanvardan uning mavjudligini tugatish to‘g‘risidagi farmonni imzoladi.

3 oktyabr kuni Ozarboyjon Davlat xavfsizlik xizmati Tog‘li Qorabog‘ning ikkinchi «prezidenti» va «tashqi ishlar vaziri» Arkadiy Gukasyan, respublikaning uchinchi «prezidenti» Bako Saakyan va «milliy assambleya raisi» David Ishxanyanni qo‘lga oldi. Ozarboyjonning APA agentligiga ko‘ra, ular Bokuga olib ketilgan va «jinoiy harakatlari uchun»da sud qilinadi.

29 sentyabr kuni Ozarboyjon xavfsizlik kuchlari Tog‘li Qorabog‘ning sobiq «armiya qo‘mondoni» Levon Mnatsakanyanni, ertasi kuni esa Tog‘li Qorabog‘ «prezidenti»ning sobiq yordamchisi David Babayanni ushladi. O‘sha kuni Ozarboyjon sudi respublika «sobiq davlat vaziri» Ruben Vardanyanni to‘rt oyga qamoqqa oldi.

Yangiliklar