Eron oliy rahnamosi AQSH bilan harbiy to‘qnashuvga bormaslikni buyurdi

^{Foto: AFP}
Eron oliy rahnamosi Oyatulloh Xomanaiy AQSH bilan to‘g‘ridan to‘g‘ri harbiy to‘qnashuvdan qochishni buyurdi. Bu haqda manbalarga tayanib, New York Times xabar berdi.

Manbalarga ko‘ra, hafta boshida Eron Milliy xavfsizlik oliy kengashi favqulodda yig‘ilish o‘tkazgan. Unda Suriya-Iordaniya chegarasidagi AQSH bazasida dron hujumi oqibatida uch nafar amerikalik askar halok bo‘lganidan keyin Vashington Eron yoki uning tarafdorlariga zarba bersa, Tehron ko‘rishi kerak bo‘lgan choralar muhokama qilingan. Vashington hujumda Iroq Islomiy qarshilik harakatining bir qismi bo‘lgan “Kataib Hizbulloh” guruhi ishtirok etganini taxmin qilmoqda.

“Ali Xomanaiyga uchrashuv natijalari haqida ma’lumot berilganida, u aniq buyruq bergan: AQSH bilan to‘g‘ridan to‘g‘ri urushga kirishmaslik va Eronni amerikaliklarning o‘limiga aloqador bo‘lgan guruhlar harakatlaridan uzoqlashtirish”, — deyiladi xabarda.

Ta’kidlanishicha, ayni paytda Islom respublikasining oliy rahnamosi AQSH Eronga hujum qilsa, javob zarbasiga tayyorgarlik ko‘rishni buyurgan. Eron qurolli kuchlari Iroq bilan chegarada ballistik raketalar joylashtirgan va havo hujumidan mudofaa tizimlarini faollashtirgan.

2023 yilning oktyabr oyida G‘azo sektorida Falastin-Isroil mojarosi avj olganidan buyon AQSHning Iroq va Suriyadagi harbiy bazalariga raketa va dronlardan foydalangan hujumlar uyushtirildi. AQSH Isroil armiyasiga harbiy yordam ko‘rsatishda davom etar ekan, shia jangarilari Iroq va Suriyadagi qurolli amaliyotlar sonini oshirishi haqida ogohlantirgan. “Zamin” yangiliklarini “Telegram”da kuzatib boring