Ukraina razvedkasi Rossiyaning Tu-134 samolyoti yoʻq qilinganini bildirdi

^{Foto: Sergei Malgavko/TASS/dpa/picture alliance}
Rossiya Qurolli kuchlarining 117-harbiy-transport aviatsiya polkiga qarashli Tu-134 harbiy-transport samolyoti 13 oktyabrga oʻtar kechasi oʻzi joylashgan «Orenburg-2» aerodromida yonib ketdi. Bu xabar 14 oktyabr, dushanba kuni Ukraina Mudofaa vazirligining Bosh razvedka boshqarmasi tomonidan Telegramʼda e'lon qilindi.

«Bunday sovet samolyotlari, xususan, Rossiya Mudofaa vazirligining yuqori martabali xodimlarini tashish uchun ishlatiladi», deyiladi postda.

Ukraina razvedka xizmati YouTubeʼda Rossiya samolyoti yonayotgani tasvirlangan videoni joylashtirdi. Ayni paytda matbuot havo kemasining roʻyxatga olish raqamlarini yozuvda tanib boʻlmasligiga e'tibor qaratadi. «Uning Rossiya Qurolli kuchlariga tegishligini e'lon qilingan parcha asosida tasdiqlashning iloji yoʻq va u olgan zarar darajasi ham noma'lum», — deydi jurnalistlar.

«Orenburg-2» — Orenburgdan 6 km janubi-gʻarbda joylashgan harbiy aerodrom. Rossiya ommaviy axborot vositalarining xabar berishicha, u erda harbiy-transport aviatsiyasining 12-Mginskaya harbiy-transport aviatsiya diviziyasi (61-havo armiyasi) tarkibiga kiruvchi 6956-havo bazasi joylashgan.

Xabar e'lon qilingan vaqtda Rossiya tomoni «Orenburg-2» harbiy aerodromidagi yongʻin haqidagi xabarlarga rasman izoh bermadi.

Rossiya Ukrainadagi Patriot HHM tizimiga zarar etkazdi

Xalqaro OAV 10 oktyabr kuni kechqurun Rossiya Dnipropetrovsk yaqinida Amerikaning Patriot HHM tizimi qurilmasini oʻqqa tutgani toʻgʻrisida xabar berdi.

Ukraina Qurolli kuchlari Havo kuchlari qoʻmondonligi aloqa boʻlimi boshligʻi vazifasini bajaruvchi Yuriy Ignat oʻqqa tutish haqidagi ma'lumotni tasdiqladi, biroq havo hujumidan mudofaa majmuasi yoʻq qilinmaganini bildirdi. «Xoʻsh, 9 oktyabrda nima sodir boʻldi? Dushman faqat bir nechta jihozlarga zarar etkazdi va ularni yoʻq qilmadi. Bu urushda nafaqat odamlar, balki texnika ham jarohat olyapti. Bundan tashqari, oʻsha Patriot boʻlinmasi mintaqadagi vazifalarni bajarishda davom etyapti», deb yozdi Ignat Facebookʼdagi sahifasida.

Uning soʻzlariga koʻra, oʻsha kuni Patriot ZRK Rossiya ballistik raketalari guruhiga qarshi havo jangida qatnashgan va ularning bir qismini tutib olishga muvaffaq boʻlgan. «Patriot tizimi dushman uchun eng muhim maqsadlardan biridir», deb qoʻshimcha qildi Ignat.

Avvalroq, xuddi shu kuni, 10 oktyabrda Oliy rada deputati Maryana Bezuglaya Telegramʼda Rossiyaning Dnipropetrovsk yaqinida Patriot tizimiga hujumi haqida yozgan edi. “Zamin”ni Telegramʻda oʻqing!