Tramp g‘alabasidan keyin Qo‘shma Shtatlarni butunlay tark etishni rejalashtirayotgan Gollivud yulduzlari

Donald Trampning tarafdorlari uning saylovdagi g‘alabasini ajoyib yutuq deb baholadilar. Biroq Amerika aholisining katta qismi bisnesmenning dasturi va rejalarini qo‘llab-quvvatlaganiga qaramay, ba’zi Gollivud vakillari bundan quvonmadi. Ularning ko‘pchiligi ijtimoiy tarmoqlarda o‘z noroziligini bildirdi.

Masalan, Selena Gomes “yuragim og‘riyapti” deb yozgan bo‘lsa, Ariana Grande esa “bugun bunday natijaning cheksiz og‘irligini his qilayotgan har bir insonga hamdard ekanini” ta’kidladi. Biroq ayrim mashhurlar fikr bildirishdan ko‘ra yangi saylangan prezident hokimiyatdan ketguncha, mamlakatni vaqtincha tark etishga qaror qilishdi.

Tom Henks

Donald Trampning g‘alabasidan so‘ng Amerikadan chiqib ketish trendini aynan aktyor Tom Henks boshlab berdi. “Forrest Gamp” filmi yulduzi ijtimoiy tarmoqlardagi sahifasida shunday yozdi:

“Og‘ir yurak va undan-da og‘irroq chamadon bilan mamlakatni rasman tark etganimni ma’lum qilaman. Ha, siz to‘g‘ri tushundingiz — hozir men buni uzoq joydan yozyapman, bu yerdan Amerika bo‘lmagan joyning ajoyib manzarasi ko‘rinadi. Nega bu yerdaman deb so‘raysizmi? Prezident Tramp 2.0 men kutgan narsa emasdi. Saylov natijalarini ko‘rganimda: “Qoch, Forrest, qoch!” deb o‘yladim va aynan shunday qildim. Iltimos, buni sevimli vatanimni tark etish deb o‘ylamang — faqatgina siyosiy sabablar tufayli juda uzoq ta’tilga chiqqanman, deb hisoblang. Balki, aynan prezident Opra davrida qaytarman”.

Biroq shov-shuvli bayonotdan ikki kun o‘tgach, muxlislar Henksni rafiqasi Rita Uilson bilan Los Anjeles aeroportida kutib olishdi. Tabiiyki, bunday tez fursatda vatanga qaytish ko‘plab savollarga sabab bo‘ldi. Aktyor bunga izoh tariqasida avvalgi bayonotini “o‘ta umidsizlik daqiqasida aytilgan so‘zlar” deb atadi. “Eshikni qattiq yopish — menga to‘g‘ri kelmas ekan”, deb qo‘shib qo‘ydi aktyor.

Richard Gir

2024 yil boshida Ispaniyaning Vanity Fair jurnaliga bergan intervyusida Richard Gir boshqa mamlakatda yashash rejalari haqida gapirib, yosh rafiqasi Aleksandra Silvani xursand qilish uchun uning vataniga ko‘chib ketmoqchiligini aytgandi. Donald Trampning g‘alabasidan so‘ng aktyor o‘z so‘zida turdi. Aktyor Kamala Harrisni ochiq-oydin qo‘llab-quvvatlagan edi.

Ma’lumki, Richard Girning Konnektikut shtatidagi ranchosi allaqachon 11 million dollarga sotilgan, aktyor va oilasining qayerda yashashi hozircha noma’lum. Faqat shunisi ma’lumki, u AQSHdan ancha uzoqda joylashgan.

Sher

Yaqinda Victoria's Secret ko‘rgazmasida chiqish qilib, jamoatchilikni xursand qilgan qo‘shiqchi Sher Guardian jurnali bilan suhbatda Donald Tramp g‘alaba qozongan taqdirda, albatta Amerikani tark etishini ma’lum qildi.

Xonandaning aytishicha, tadbirkorning o‘tgan 4 yillik boshqaruvi uning sog‘lig‘iga jiddiy zarar yetkazgan — xonandaning oshqozon yarasi ochilib ketgan. Yangi prezidentga bo‘lgan munosabatni oddiy adovat deb atash qiyin, chunki bir paytlar xonanda “uni Yer yuzidan yo‘q bo‘lib ketishini” xohlayotganini aytgandi. Aynan shuning uchun u vaziyatdan chiqishning eng mantiqiy yo‘li sifatida mamlakatdan ko‘chib ketishni ko‘radi. Hozircha ommaviy axborot vositalarida Sherning mamlakatni tark etgani haqida rasmiy ma’lumot yo‘q.

Robert De Niro

Mashhur aktyor Robert De Niro Donald Trampning eng ashaddiy dushmanidir. De Niro prinsip masalalari tufayli keyingi 4 yil davomida AQSHga borishni imkonsiz deb atadi:

“Agar 45-prezident Oq uyga qaytsa, bu mamlakatni butunlay tark etaman. Bunday odam hokimiyat tepasida turgan joyda qololmayman. Bu prinsip va ma’naviy mas’uliyat masalasi. Gap odatdagidek siyosat haqida emas. Gap millatimiz qalbiga taalluqli. Biz yetkazilgan zararni ko‘rdik va bunga yana chidash imkonsiz. Men Amerikani sevaman, lekin uni juda sevganim uchun jim turolmayman va bunga sherik bo‘lolmayman”.

“Tentak”, “ahmoq”, “masxaraboz” va “gangster” — aktyor intervyularida Trampni shunday nomlar bilan atagan. Biroq hozircha De Nironing Amerikani tark etgani haqidagi xabarlar yolg‘on bo‘lib chiqdi. Aftidan, tobora ko‘proq mashhurlar Tom Henks safiga qo‘shilib, keskin bayonotlarini hissiy jo‘shqinlik va oddiy insoniy tuyg‘ular bilan izohlashmoqda.

Sofi Terner

“Taxtlar o‘yini” teleseriali yulduzi Donald Tramp g‘alaba qozongan taqdirda “bu yerdan jo‘nab ketishini” aytdi. Terner vaqtining ko‘p qismini vatani Buyuk Britaniyada o‘tkazadi, shuning uchun muxlislar yaqin kelajakda aktrisaning Angliyaga butunlay qaytishi haqidagi e’lonni kutishlari mumkin. Jo Jonas bunga rozi bo‘ladimi yoki yo‘qmi noma’lum, chunki Sofi ikki qizi bilan ko‘chib ketishni rejalashtirmoqda. “Zamin” yangiliklarini “Twitter”da kuzatib boring