Lukashenko hokimiyatni tinch yoʻl bilan yangi avlodga topshirmoqchi ekanini aytdi

^{Foto: Vesti.az}
Belarus prezidenti Aleksandr Lukashenko hokimiyatga tirmashib olmasligini, uni yangi avlodga tinch va osoyishta yoʻl bilan topshirish uchun hamma narsaga tayyorligini aytdi. Lukashenko bu haqda Logoiskdagi ibodatxonaga tashrifi chogʻida ma'lum qildi, deb xabar bermoqda “BelTA”.

Shu bilan birga, u yangi hukumat davrida yashay olishiga umid bildirdi. “Mening bolalarim qanday yashashlarini koʻrishni xohlayman”, dedi Lukashenko.

Belarus prezidenti hokimiyatni kuch bilan saqlab qolishga harakat qilmayotganini qoʻshimcha qildi. Belarusda navbatdagi prezidentlik saylovi 2025 yil 26 yanvarga belgilangan.

Unda ishtirok etish uchun besh kishi, jumladan, 1994 yildan beri respublika prezidenti lavozimini egallab kelayotgan va yettinchi prezidentlik muddatiga oʻz nomzodini qoʻymoqchi boʻlgan Lukashenko da'vogarlik qilmoqda.

Avvalroq Aleksandr Lukashenko Belarusdagi saylovlarda tartibsizliklar yuzaga kelsa, harbiylarni jalb qilishga tayyorligini ma'lum qilgandi.

“Zarur boʻlganda politsiya, kerak boʻlganda tartib oʻrnatilishi uchun harbiylarni qoʻrqmasdan jalb qilaveringlar”, dedi Belarus prezidenti gubernatorlar bilan uchrashuvda.

Uning soʻzlariga koʻra, Belarusda saylov komissiyalari a'zolariga tashqaridan bosim oʻtkazishga urinishlar kuzatilmoqda.