TIV oʻzbeklarni it deb haqoratlagan shaxs boʻyicha qanday bayonot berdi?

^{Videodan kadr}
Ijtimoiy tarmoqlarda Rossiya fuqarosi deb taxmin qilingan shaxsning oʻzbeklarni it deb atagani aks etgan video tarqalgan edi. Oʻzbekiston Tashqi ishlar vazirligining ma'lum qilishicha, video internetda topilishi bilanoq Rossiya tomoniga zudlik bilan murojaat qilingan.

“Qaysi millatga mansub boʻlishidan qat'i nazar, xalqimizga qarata aytilayotgan bunday gaplarni mutlaqo qabul qilib boʻlmaydi. Oʻzbekiston oʻz fuqarolarining huquqlari, sha'ni va qadr-qimmatini qayerda boʻlishidan qat'iy nazar doimo himoya qilgan va himoya qiladi.

Biz axborot maydonini muntazam ravishda kuzatib boramiz. Ushbu video internetda topilishi bilanoq, Rossiya tomoniga diplomatik kanallar orqali zudlik bilan murojaat qilingan. Bunday paytlarda asl manbani topish va materialning haqiqiyligini tekshirish juda muhimdir.

Tabiiyki, Rossiya tomoni shu zahotiyoq “Bunday haqoratomuz bayonotlar, kim tomonidan aytilishidan qat'i nazar, chuqur afsuslanarliligi”ni ta'kidladi.

Tekshiruvlar natijasida ushbu material provokatsion xususiyatga ega boʻlib, xalqlarimiz oʻrtasidagi munosabatlarga nizo keltirib chiqarishga urinayotgan buzgʻunchi kuchlar tomonidan toʻqib chiqarilgani ma'lum boʻldi.

Rossiya tomonining xabar berishicha, videoda tilga olingan shaxs Rossiya Federatsiyasi fuqarosi emas. Hozirda Rossiyaning rasmiy OAVlari ham bu borasida qator materiallarni e'lon qilmoqda”, – deyiladi Oʻzbekiston TIV matbuot kotibi Ahror Burhonov tarqatgan bayonotda.

Rossiya TIV soʻzchisi Mariya Zaxarovaga koʻra, FSB bu erkakning shaxsini aniqlagan: u Nikolay Nikolayevich Kochmarik. Bayonotda u ukrainalik ekani iddao qilingan. “Zamin” yangiliklarini “Telegram”da kuzatib boring