Hindistonda 25 kuyovni aldagan «kelin» politsiya qo‘liga tushdi

Hindistonda so‘nggi kunlarda katta shov-shuvga sabab bo‘lgan voqea yuz berdi. 23 yoshli Anuradha Pasvan nomzodi turli platforma va agentliklar orqali taklif qilingan erkaklarga turmushga chiqib, keyin ularni firibgarlik yo‘li bilan mol-mulkidan mahrum qilib ketgani fosh etildi. Bu haqda The Economic Times nashri xabar berdi.

Pasvan hozirgacha yetti oy ichida turli shtatlarda 25 ta erkakka nikoh orqali turmushga chiqqan. Ammo undan keyingi ssenariy barcha holatda deyarli bir xil bo‘lgan: to‘ydan bir necha kun o‘tib, kelin yangi uyidan pul, tilla va qimmatbaho elektronika buyumlarini olib, g‘ayib bo‘lgan.

Ushbu qiziqarli, ammo ko‘plab odamlarni moliyaviy talafotga uchratgan sxemaning aniqlanishiga Vishnu Sharma ismli erkakning politsiyaga qilgan murojaati sababchi bo‘ldi. Uning so‘zlariga ko‘ra, 20 aprel kuni to‘y qilgani kelini 2 mayda barcha qimmatbaho buyumlarini olib, ketib qolgan.

Pasvanning jinoiy faoliyati agentliklar orqali tashkil qilingan bo‘lib, u WhatsApp va boshqa onlayn platformalar orqali kuyov izlagan. Firibgarlikni fosh qilish uchun politsiyachilardan biri yashirincha «kuyov» rolini o‘ynab, «jonli tuzoq» usulida uni ushlashga muvaffaq bo‘ldi.

Ma’lum bo‘lishicha, Anuradha Pasvan avvalgi turmushi maishiy janjal bilan yakunlanganidan so‘ng, boshqa shaharga ko‘chib o‘tgan va o‘sha yerda jinoiy guruhga qo‘shilgan.

Ayni paytda huquqni muhofaza qilish organlari ushbu holat yuzasidan tergov harakatlarini boshlagan. Zarar ko‘rganlarning soni yana ko‘payishi mumkinligi aytilmoqda.

Zamin.uz tahririyati shunday holatlar yuz bermasligi uchun nikoh munosabatlarida ehtiyotkorlik va huquqiy savodxonlikni oshirish muhimligini yana bir bor eslatib o‘tadi.