Hindistonda Londonga uchayotgan samolyot halokatga uchradi. Asosiy ma’lumotlar

Hindiston g‘arbidagi Gujarot shtatida, Ahmadobod shahri aeroporti yaqinida sodir bo‘lgan yirik aviahalokat nafaqat mamlakat, balki dunyo aviatsiyasi uchun ham og‘ir sinovga aylandi. 12 iyun kuni Air India aviakompaniyasiga tegishli Boeing 787-8 Dreamliner uchog‘i Londonga yo‘l olish uchun havoga ko‘tarilganidan bor-yo‘g‘i ikki daqiqa o‘tganidan so‘ng halokatga uchradi. Flightradar ma’lumotlariga ko‘ra, mahalliy vaqt bilan 10:06 da parvoz boshlangan, 10:08 da esa uchoqdan so‘nggi signal kelgan.

Halokat ro‘y bergan joy aeroportdan uncha uzoq emas — aholi yashash kvartalida, tibbiyot oliygohining yotoqxonasi yaqinida bo‘lib o‘tdi. Samolyot qurilish binolari ustiga qulagan va bu faqat yo‘lovchilar emas, balki quruqlikdagi odamlar hayotiga ham zomin bo‘ldi. Voqea joyida quyuq tutun ko‘tarildi, ijtimoiy tarmoqlarda halokatdan oldingi va qulagan uchoq videolari keng tarqaldi.

Samolyot bortida 242 kishi bo‘lgani ma’lum qilindi — 230 nafar yo‘lovchi va 12 nafar ekipaj a’zosi. Ular orasida Hindiston, Buyuk Britaniya, Portugaliya, Kanada fuqarolari ham bor edi. O‘zbekiston Tashqi ishlar vazirligi o‘zbekistonliklar borligi haqida ma’lumot yo‘qligini rasman tasdiqladi. Yo‘lovchilardan 11 nafari bolalar bo‘lgan. Voqeadan so‘ng mahalliy telekanallar dastlab 133 nafar halok bo‘lganini xabar qildi. Reuters axborotiga ko‘ra, shifoxonalarga 100 dan ziyod jasad olib kelingan, qurbonlar soni yanada oshishi mumkin.

Aviakatastrofa qurbonlari nafaqat yo‘lovchilar va ekipaj, balki yerda bo‘lgan odamlar — asosan talabalar va mahalliy aholi hamdir. Reuters axborotida qutqaruvchilar vayronalar ostida qolgan 30-35 kishining jasadini topgani qayd etilgan.

Air India aviakompaniyasi rasmiy bayonot berib, Londonga uchgan AI171 reysi bilan bog‘liq "hodisa" yuz bergani va qo‘shimcha ma’lumotlar keyinroq e’lon qilinishi aytildi. Londondagi Getvik aeroporti bu reys mahalliy vaqt bilan soat 18:25 da qo‘nishi kerak bo‘lganini ma’lum qildi.

Samolyot halokati bog‘liq bo‘lgan Boeing 787 Dreamliner nafaqat Air India, balki butun Boeing kompaniyasi uchun katta yo‘qotish va juda jiddiy voqeadir. Dreamliner oilasiga mansub ushbu samolyot 2014 yilda Air India aviaparkiga qo‘shilgan, ilk bor 2009 yilda parvoz qilgan va 15 yil davomida shunday yirik halokatga uchramagan edi. Dreamliner – Boeing‘ning innovatsion ishlanmasi, kompozit materiallardan tayyorlangan, yoqilg‘i tejamkor va uzoq masofaga uchish imkoniga ega. Ammo texnik muammolar ushbu turdagi uchoqlar uchun ham begona emas: 2013 yilda Yaponiya aviakompaniyalarida litiy-ion batareyalarining yonuvi sababli barcha Dreamliner'lar vaqtincha parvozlardan chiqarilgan edi.

Bu fojea dunyo aviatsiyasi uchun ham og‘ir zarba. Boeing kompaniyasi aksiyalari halokatdan keyin AQSHdagi savdolarda 8 foizga arzonlashdi. Bu esa bozorda kompaniyaga bo‘lgan ishonchga jiddiy ta’sir ko‘rsatdi. Yaqin yillarda Boeing texnik muammolar va boshqa halokatlar bilan bir necha bor tanqidlarga uchragan edi, endi esa Dreamliner halokati shunday sinovlarning yana biriga aylandi.

Halokat sabablari hozircha rasman e’lon qilinmadi. Qutqaruv va tergov ishlari davom etmoqda. Hindiston sog‘liqni saqlash vazirligi "juda ko‘p odam halok bo‘lgani"ni tan oldi, biroq qurbonlar soni aniqlashtirilmoqda. Hindiston politsiyasi vakiliga ko‘ra, amalda ekipaj va yo‘lovchilardan omon qolganlar yo‘q.

Ahmadobod fojeasi nafaqat mamlakat, balki butun dunyodagi aviasanoat, parvoz xavfsizligi va zamonaviy texnologiyalar ishonchining yangi sinovi bo‘ldi. Mazkur halokat aviatsiya tarixida katta iz qoldirishi va xavfsizlik talablarini yanada kuchaytirishga sabab bo‘lishi aniq. “Zamin”ni Telegramʻda oʻqing!