Yuz bergan mudhish ciyosiy qotillik Minnesota shtatini larzaga soldi

AQSHning Minnesota shtatida yuz bergan mudhish voqea butun mamlakat jamoatchiligini qattiq larzaga soldi. 15 iyun kuni shtatning mashhur va e’tirof etilgan deputatlaridan biri, Minnesota parlamentining sobiq spikeri Melissa Xortman va uning turmush o‘rtog‘i Mark Xortman erta tongda o‘z uylarida otib o‘ldirildi. Bu haqda Associated Press (AP) agentligi xabar berdi.

Minnesota shtati gubernatori Tim Uolts mazkur voqeaga juda qattiq izoh berib, "bu qotillik, barcha belgilarga ko‘ra, siyosiy sabablarga ega bo‘lgan va shtatimiz eng ajoyib yetakchilardan birini yo‘qotdi", deb ta’kidladi. U shunday deb qo‘shimcha qildi: "Melissa va Mark hech qachon o‘chmas iz qoldirgan, xalq xizmatiga sodiq insonlar edi. Ularga qilingan zo‘ravonlik barchamizni chuqur qayg‘uga soldi."

Ayni paytda, yana bir shov-shuvli voqea qayd etildi: shtat senatorlaridan Jon Xoffman va uning rafiqasi ham shu kuni og‘ir jarohat olishgan. Gubernatorning aytishicha, Jon va uning rafiqasi darhol shifoxonaga yetkazilib, ular operatsiya qilingan. Hozirda shifokorlar ularning ahvolini "ehtiyotkorona optimistik" deb baholamoqda.

Politsiya ma’lumotlariga ko‘ra, hujumchi o‘zini huquq-tartibot idoralari xodimi sifatida ko‘rsatgan va voqea joyiga yetib kelgan qo‘riqlash kuchlari bilan otishmadan so‘ng voqea joyidan qochib ketgan. Hozirda butun Minnesota bo‘ylab keng ko‘lamli qidiruv ishlari olib borilmoqda. Qotilni topish va qonun oldida javobgarlikka tortish maqsadida federal va mahalliy organlar hamkorlikda faol harakat qilmoqda.

Hodisa nafaqat Minnesota, balki butun AQSHda siyosiy zo‘ravonlik va xavfsizlik muammolari borasida jiddiy savollarni kun tartibiga chiqardi. Melissa Xortman Minnesota jamoatchiligida va siyosiy doiralarda o‘z faoliyati, bag‘rikengligi va halolligi bilan hurmat qozongan edi. Uning vafoti ko‘plab odamlarni qattiq tashvish va qayg‘uga soldi.

Minnesota gubernatori va davlat rasmiylari bu hodisani qoralab, barcha aybdorlar qonun oldida javob berishini va’da qilmoqda. Jamoatchilik esa Melissa va Mark Xortmanning xotirasini abadiy saqlash va ular boshlagan ishlarni davom ettirishga chaqirilmoqda.

Ushbu fojia Amerikaliklarni siyosiy xavfsizlik masalalariga yanada jiddiy yondoshish va birdamlikka chaqirmoqda. Minnesota va butun AQSH aholisi jabrlanuvchilarning oilasiga samimiy ta’ziya bildirish bilan birga, bu kabi zo‘ravonliklar endi takrorlanmasligini umid qilib turibdi.

Foto: Alex Kormann/Star Tribune via AP