Zelenskiy shart qo‘ydi: Ukraina, Rossiya va AQSH yetakchilari uchrashuvi kutilmoqda

Ukrainadagi urush to‘xtashi uchun yangi qadamlar: prezident Volodimir Zelenskiy Moskva bilan keyingi muzokaralar qanday shartlarda o‘tadi, degan savolga aniq javob berdi, deb xabar berdi dw.com. Zelenskiy 10 iyul kuni Rimda o‘tkazilgan Ukrainada urushdan keyingi tiklanishga bag‘ishlangan 4-xalqaro konferensiyada jurnalistlar savollariga javob qaytardi.

Davlat rahbarining ta’kidlashicha, muzokaralar jarayoni yanada mazmunli bo‘lishi uchun, avvalambor, tomonlar avvalgi kelishuvlarni — ya’ni Istanbulda ikkinchi uchrashuvda amalga oshirilgan almashinuvlarni to‘liq yakunlashi shart. U “Biz 2 iyun kuni Istanbulda erishilgan kelishuvlar, og‘ir yaralanganlar va 25 yoshgacha bo‘lgan asirlarni almashish, shuningdek, halok bo‘lgan askarlar jasadlarini topshirish jarayonlarini yakunlashimiz lozim”, dedi.

Ma’lumot uchun, iyun oyi davomida Ukraina va Rossiya bir necha marta harbiy asirlarni va halok bo‘lganlar jasadlarini almashdi. Istanbul muzokaralaridan keyin 9, 10, 12, 19 va 20 iyun kunlari turli almashinuvlar amalga oshirildi. Zelenskiy fikricha, bu jarayon yaqin vaqtda to‘liq yakunlanadi va shundan keyin yangi bosqich — yetakchilar darajasidagi to‘g‘ridan to‘g‘ri uchrashuvni tayyorlash mumkin bo‘ladi.

Zelenskiy muzokaralar uchun eng maqbul format — davlat rahbarlari darajasidagi Ukraina–Rossiya–AQSH uchrashuvi ekanini ta’kidladi. Uning fikricha, bunday muloqotda faqat so‘zlar emas, balki aniq va amaliy kafolatlar ham muhokama qilinishi kerak. “Stolda faqat mulohazalar emas, balki aniq kafolatlar bo‘lishi lozim”, dedi prezident.

Aytish joiz, Vatikan, Avstriya, Shveysariya va Turkiya allaqachon bu muzokaralar uchun maydoncha taklif etgan. Ukraina rahbariyati esa ushbu takliflarni puxta o‘rganmoqda va muhokamalarning barcha talablarga javob beradigan, samarali va barqaror formatda o‘tishi uchun harakat qilmoqda.

Yakuniy qaror va uchrashuv sanasi hozircha aniq emas. Biroq, Ukraina prezidentining so‘zlariga qaraganda, endigi eng asosiy maqsad — insonparvarlik almashinuvi jarayonlarini to‘liq yakunlash va keyin yetakchilar darajasida hal qiluvchi muzokaralar boshlanishini ta’minlash.

Ukraina va Rossiya o‘rtasidagi murakkab tortishuvlar qanday yechimga keladi va Vashingtonning roli bu jarayonda qanchalik kuchli bo‘ladi? Yaqin haftalarda muhim siyosiy voqealar kutilmoqda. “Zamin”ni Telegramʻda oʻqing!