OpenAI rahbari Sem Altmanning so‘zlariga ko‘ra, sun’iy intellekt platformalari orqali amalga oshirilayotgan shaxsiy muloqotlar shifokor yoki huquqshunos bilan bo‘lgan suhbatlar kabi maxfiy himoyaga ega emas. Ayniqsa so‘nggi vaqtlarda ko‘plab foydalanuvchilar ChatGPT'dan psixologik maslahat olish, hayot muammolarini muhokama qilish va shaxsiy muammolar yuzasidan maslahat so‘rash uchun foydalanmoqda. Biroq, bu turdagi muloqotlar hukumat yoki sud organlari talabi bilan oshkor etilishi mumkin.
Sem Altman ta’kidlaganidek, hozirgi kunda shifokorlar, psixoterapevtlar va advokatlar bilan olib boriladigan suhbatlar maxsus qonunlar asosida maxfiy hisoblanadi va hech kim bu ma’lumotlarni sudsiz oshkor etishga haqli emas. Lekin ChatGPT kabi sun’iy intellekt tizimlarida hali bunday huquqiy kafolatlar mavjud emas. Altman buni jiddiy muammo sifatida baholab, insonlar sun’iy intellekt bilan amalga oshirayotgan muloqotlar ham huquqiy himoyaga ega bo‘lishi lozimligini bildirdi.
Unga ko‘ra, foydalanuvchi ChatGPT'ga shaxsiy muammolarini yozib murojaat qilsa va keyinchalik qandaydir sud jarayoni boshlansa, sud qarori bilan OpenAI ushbu yozishmalarni taqdim etishga majbur bo‘lishi mumkin. U bu holatni noravo etib, insonlar sun’iy intellektga murojaat qilganda ham o‘zining shaxsiy ma’lumotlariga ishonch bilan yondashish imkoniga ega bo‘lishi kerakligini ta’kidladi.
Shuningdek, u ta’kidladiki, WhatsApp yoki Signal kabi messenjerlar shifrlangan va ulardagi yozishmalarni platforma egalari o‘qiy olmaydi. Ammo OpenAI o‘zining xizmatlarida foydalanuvchilarning yozishmalaridan modelni takomillashtirish va nosog‘lom xatti-harakatlarni aniqlash uchun foydalanishi mumkin. Bu esa shaxsiy ma’lumotlar xavfsizligi masalasini yanada murakkablashtiradi.
OpenAI'ning amaldagi siyosatiga ko‘ra, ChatGPT foydalanuvchilarining yozishmalari, agar xavfsizlikka oid talab yoki qonun talab etmasa, 30 kun ichida avtomatik o‘chiriladi. Ammo bu muddat ichida ma’lumotlar saqlanishi va zarurat tug‘ilganda foydalanilishi ehtimoli bor.
Mutasaddilarning ta’kidlashicha, sun’iy intellekt asosidagi xizmatlar inson hayotida tobora ko‘proq o‘rin egallayotgan bir paytda, shaxsiy ma’lumotlarni himoya qilish masalasi alohida dolzarb ahamiyat kasb etadi. Bu borada xalqaro huquqiy mexanizmlar ishlab chiqilishi talab etilmoqda.
Zamin.uz tahririyati texnologiya va xavfsizlik borasidagi eng muhim yangiliklarni faol kuzatib boradi va sizlarni xabardor etishda davom etadi.
“Zamin”ni Telegramʻda oʻqing!
