“Barcha garovdagilar birdaniga ozod qilinadi” — G‘azoda yangi kelishuv rejasi

Isroil Bosh vaziri Benyamin Netanyahu G‘azodagi sulh bo‘yicha muzokaralarda asosiy maqsad barcha qolgan garovdagilarni bir vaqtning o‘zida ozod qilish ekanini aytdi. Avvalroq reja 60 kunlik sulh va garovdagilarning bir qismini ozod etishni nazarda tutgan edi.

Hamas vakillari Qohirada Misr rasmiylari bilan dastlabki muzokaralar olib bormoqda. Xabarlarga ko‘ra, vositachilar kelgusi haftalarda kelishuvga erishishga harakat qilmoqda. O‘tgan oyda muzokaralar uzilgach, Isroil butun G‘azoni egallash rejasini e’lon qilgan.

So‘nggi kunlarda G‘azoda hujumlar kuchaydi. Hamas boshqaruvidagi sog‘liqni saqlash vazirligi ma’lumotiga ko‘ra, bir sutkada kamida 123 kishi halok bo‘ldi. G‘azo shahridagi Zaytun tumani eng ko‘p zarba ostida qoldi, o‘nlab tinch aholi, jumladan bolalar halok bo‘ldi.

Netanyahu barcha garovdagilar qaytarilmaguncha urush tugamasligini ta’kidladi. Isroil hisobiga ko‘ra, 7-oktabr hujumida garovga olingan 251 kishidan 50 nafari hanuz G‘azoda, ulardan 20 nafari tirik. Misr va Qatar barcha garovdagilarni ozod qilish evaziga urushni to‘xtatish bo‘yicha yangi taklif tayyorlamoqda.

Hamas garovdagilarni falastinlik mahbuslarga almashishni va Isroil qo‘shinlarini to‘liq olib chiqishni talab qilmoqda. BMT esa G‘azoda ocharchilik xavfi keskin kuchayganini va aholini majburiy ko‘chirish xalqaro huquqni buzishini ogohlantirmoqda.