Xitoy va Rossiya o‘rtasidagi munosabatlar yangi bosqichga qadam qo‘ymoqda. Xitoy Xalq Respublikasi Tashqi ishlar vazirligi ma’lum qilishicha, 2025 yil 15 sentyabrdan boshlab Rossiya Federatsiyasi fuqarolari mamlakatga vizasiz kirish imkoniyatiga ega bo‘ladi.
Ushbu tartib sinov tariqasida bir yil amal qiladi va 2026 yil 14 sentyabrgacha kuchda bo‘lishi belgilangan. Bu muddat mobaynida Rossiya fuqarolari Xitoyga biznes, turizm yoki shaxsiy tashrif maqsadlarida vizasiz kelib, 30 kungacha qolishlari mumkin bo‘ladi.
Rasmiy Pekinning ta’kidlashicha, bu qaror ikki davlat o‘rtasidagi yaqin hamkorlikni mustahkamlash va fuqarolarning erkin almashinuvini qo‘llab-quvvatlashga xizmat qiladi. Xitoy TIV rasmiy vakili Guo Jiakuning aytishicha, tashabbus nafaqat sayohat sohasida, balki savdo va madaniy aloqalarda ham katta rag‘batlantirish bo‘ladi.
Shu bilan birga, mutaxassislar ushbu qadamning siyosiy ahamiyatiga ham e’tibor qaratmoqda. Chunki so‘nggi yillarda Moskva va Pekin o‘rtasidagi strategik sheriklik sezilarli darajada kuchayib, turli sohalarda hamkorlik yangi bosqichga ko‘tarilmoqda.
Aytish joizki, Xitoy bundan avval qator davlatlar bilan shunday vizasiz kelishuvlarni yo‘lga qo‘ygan va ular orqali turizm oqimi hamda o‘zaro iqtisodiy aloqalar keskin oshgan. Rossiya bilan yo‘lga qo‘yilgan tizim esa ikki tomonlama aloqalarni yanada jonlantirishi kutilmoqda.
Shu tariqa, rossiyalik sayyoh va tadbirkorlar uchun yangi imkoniyat eshiklari ochilayotgan bir paytda, Xitoy ham o‘z iqtisodiyotini jonlantirish va xalqaro maydonda nufuzini oshirish uchun yana bir qadam tashladi.
“Zamin”ni Telegramʻda oʻqing!
