Rossiya Federatsiyasi hududida tartib-intizom va xavfsizlikka alohida e’tibor qaratilmoqda. Mamlakat hukumati tomonidan tayyorlanayotgan yangi chora-tadbirlar asosida qoidabuzar xorijiy fuqarolarning mamlakatga kirishi yoki unda qolishi cheklanishi mumkin, deb xabar berdi RIA Novosti.
Ma’lumotlarga ko‘ra, amaldagi federal migratsiya qonunchiligida aniq qoidalar belgilangan. Agar chet el fuqarosi uch yil ichida ikki yoki undan ko‘p marta ma’muriy javobgarlikka tortilsa, uning Rossiyaga kirishi taqiqlanishi mumkin. Bu kabi cheklovlar yo‘l harakati qoidalarini buzgan holatlarga ham to‘liq taalluqli bo‘ladi.
Huquqiy hujjatda misol sifatida qator qoidabuzarliklar keltirilgan: texnik ko‘rikdan o‘tmagan transport vositasini haydash, piyodalar o‘tish joyida ustunlik bermaslik, davlat raqamlarini noto‘g‘ri o‘rnatish kabi holatlar xorijlik haydovchilar uchun katta muammoga aylanishi mumkin. Bunday qonunbuzarliklar natijasida ularga mamlakatga uch yilgacha kirish taqiqlanishi ehtimoli yuqori.
Mutasaddilarning ta’kidlashicha, bu chora-tadbirlar Rossiyada qonuniylikni mustahkamlash, yo‘llarda xavfsizlikni ta’minlash va jamoat tartibini saqlash maqsadida joriy etilmoqda. Shu bilan birga, xorijiy mehnat muhojirlari va haydovchilardan mamlakat qonunlariga hurmat bilan munosabatda bo‘lish talab etiladi.
Jamoatchilik orasida bu tashabbus turli fikrlarni keltirib chiqardi. Ayrimlar bu orqali yo‘l harakatida intizom kuchayadi, deb hisoblasa, boshqalar xorijlik fuqarolar uchun bu juda qattiq cheklov bo‘lishi mumkinligini ta’kidlamoqda.
Yakuniy qaror qabul qilinsa, Rossiyaga tashrif buyuruvchi har bir xorijiy fuqaro yo‘l qoidalariga jiddiy e’tibor qaratishiga to‘g‘ri keladi. Chunki kichik qoidabuzarlik ham ularning mamlakatga kirish imkoniyatini yo‘qotishi mumkin.
“Zamin”ni Telegramʻda oʻqing!
