Farg‘ona viloyati Buvayda tumanida istiqomat qiluvchi 130 yoshli Huwaydo Umarova (Toshmatova) rasman O‘zbekiston tarixidagi eng yoshi ulug‘ inson sifatida qayd etildi, deya Adliya vazirligi ma’lum qildi.
Ma’lumotlarga ko‘ra, vazirlik tashabbusi bilan o‘tkazilgan “Hech bir shaxs hujjatsiz qolmaydi” aksiyasi chog‘ida tumanning “Qoraqum” mahallasida o‘tkazilgan ro‘yxatlarda Huwaydo momoning tug‘ilgan sanasi hujjatlarda qayd etilmagani aniqlangan.
Buvayda tumani Adliya bo‘limi arizasi asosida fuqarolik ishlari bo‘yicha Qo‘qon tumanlararo sudining sayyor majlisida masala ko‘rib chiqildi. Sud qaroriga ko‘ra, Umarova (Toshmatova) Huwaydo 1895 yil 1-yanvarda Buvayda tumanida tug‘ilgani rasman tasdiqlandi.
Shu tariqa, Huwaydo momo hozirda O‘zbekistonda eng yoshi ulug‘ shaxs sifatida tan olindi. Adliya vazirligi ma’lum qilishicha, endi u Ginnesning rekordlar kitobiga dunyodagi eng katta yoshdagi inson sifatida kiritilishi mumkin.
Eslatib o‘tamiz, avval ham Huwaydo momo haqida turli xabarlar tarqalgan, ammo uning yoshini tasdiqlovchi rasmiy hujjat mavjud emas edi. Endi esa sud qarori orqali bu ma’lumot qonuniy kuchga kirdi. Voqealar rivojini kuzatishda davom etamiz.
“Zamin”ni Telegramʻda oʻqing!
