Malayziyada jamoatchilik orasida katta bahslarga sabab bo‘lgan noodatiy holat qayd etildi. Bir maktab o‘quvchisi o‘qishga borishdan qochish uchun o‘zining o‘g‘irlanishi haqida dramatik hikoya to‘qib chiqqan. Bu haqda World of Buzz xabar tarqatdi.
Ma’lumotlarga ko‘ra, bola va uning otasi politsiyaga murojaat qilib, maktabga yo‘l olgan paytda kimdir uni o‘g‘irlab ketishga uringani haqida ariza yozib berishgan. Ammo tergov jarayoni chog‘ida voqeaning haqiqatga umuman mos kelmasligi, bu barchasi o‘ylab topilgan ssenariy ekani ma’lum bo‘lgan.
Huquq-tartibot organlari bosimi ostida o‘smir tan olishga majbur bo‘lgan. Uning so‘zlariga ko‘ra, u uyda qolish uchun otasini ishontirish maqsadida ushbu “ssenariy”ni o‘ylab topgan.
“U maktabga borishni xohlamagan, chunki poyabzali mushukning iflosi bilan bulg‘angandir”, — deb izoh berdi politsiya vakillaridan biri.
Hodisa juda jiddiy ko‘rinishiga qaramay, bolaning yoshi va maqomi e’tiborga olinib, unga nisbatan jinoyat ishi ochilmagan. Shuning o‘rniga, ham bolaga, ham uning otasiga rasmiy va qat’iy ogohlantirish berilgan.
Politsiya rasmiylari jamoatchilikka murojaat qilib, ayniqsa ota-onalarni bolalarga bunday harakatlarning oqibatlarini tushuntirib berishga chaqirdi. Ularga ko‘ra, soxta bayonotlar politsiya resurslarini behuda sarflaydi, qolaversa, voyaga yetmaganlar uchun ham jiddiy huquqiy oqibatlarga sabab bo‘lishi mumkin.
Eslatib o‘tamiz, bundan avval Toshkent viloyati Yuqori Chirchiq tumanida ham bola o‘g‘irlanishi haqida mish-mishlar tarqalgan edi. Ammo hokimiyat va IIBB bu kabi xabarlarni rad etib, hech qanday voqea qayd etilmaganini ma’lum qilgandi.
“Zamin”ni Telegramʻda oʻqing!
