Xitoyda fan olamini hayratga solgan navbatdagi katta kashfiyot ro‘y berdi. Markaziy hududda joylashgan Sinlunshan qazilma qo‘riqxonasida olimlar toshga aylangan tuxum qobig‘idan iborat noyob topilmalarni aniqladi. CNN yozishicha, ushbu topilma 28 ta tuxumdan iborat bo‘lib, ularning yoshi taxminan 86 million yil ekani hisoblab chiqildi.
Mutaxassislar ma’lum qilishicha, topilgan tuxumlarning ko‘pchiligi Dendroolithidae oilasiga mansub bo‘lib, “Placoolithus tumiaolingensis” turiga tegishli. Ularning shakli biroz yassilangan shar ko‘rinishiga ega, uzunligi 120–170 millimetrgacha, qobig‘ining qalinligi esa 2,4 millimetrdan oshmaydi. Bu esa ularning noyob geologik xususiyatlarini ko‘rsatib turadi.
Olimlar sanani aniqlashda “atom soati” deb ataladigan usuldan foydalanishgan. Ya’ni tuxum qobig‘idagi qo‘rg‘oshin va uran izotoplari o‘lchanib, ularning aniq yoshi hisoblab chiqilgan.
Tadqiqotchilar endilikda ushbu texnika nafaqat yoshni belgilash, balki dinozavrlarning sovuq iqlimga qanday moslashganini o‘rganishda ham yordam berishidan umidvor. Chunki bu ma’lumotlar juda qadimgi turlar hayoti haqida yangi qirralarni ochishi mumkin.
“Biz topilmalarni juda ehtiyotkorlik bilan o‘rganishimiz zarur. Bu juda murakkab jarayon bo‘lib, zamonaviy laboratoriya va yuqori aniqlikka ega asbob-uskunalar talab qiladi. Eng muhimi, namuna boshqa moddalar bilan ifloslanib qolmasligi kerak”, — dedi tadqiqot yetakchisi Bi Chjao.
Mutaxassislar fikricha, ushbu kashfiyot jahon paleontologiyasida muhim bosqich bo‘lib, kelgusida dinozavrlar hayoti va ularning muhitga moslashuvi haqida yangi ma’lumotlarni ochib berishi mumkin.
“Zamin”ni Telegramʻda oʻqing!
