Hindistonda yuz bergan jon saqrashga arziydigan voqea butun jamoatchilikni hayajonga soldi. BBC yozganidek, 20 kunlik chaqaloq tiriklayin ko‘milgan holda topilgan.
Ma’lumotlarga qaraganda, chaqaloqni oddiy qo‘yboqar cho‘pon tasodifan topib olgan. U tuproq ostida kelayotgan yig‘ini eshitib, yaqinlashganda yer ostidan chaqaloqning qo‘li ko‘rinib turganini payqagan. Shu zahoti u qishloq aholisini chaqirgan, keyin esa politsiyaga xabar berilgan.
Huquq-tartibot organlari xodimlari bolani qazib olib, darhol shifoxonaga yetkazishgan. Shifokorlar uning ahvoli og‘ir ekanini aytgan: chaqaloq butunlay tuproqqa belangan, og‘zi va burniga qum kirib, nafas olish qiyinlashgan. Uning tanasida hasharot chaqishi, hatto hayvon hujumi izlari ham topilgan.
Bir kecha-kunduz davomida ahvoli biroz yaxshilangani kuzatilgan bo‘lsa-da, keyin infeksiya sabab holati yana yomonlashgan. Tabiblar so‘zlariga ko‘ra: “Prognoz ijobiy emas, lekin biz uni qutqarish uchun bor imkoniyatni ishga solmoqdamiz”.
Hozircha politsiya chaqaloqning ota-onasini topa olmagan, tergov ishlari olib borilmoqda.
Mutasaddilar ta’kidlashicha, bunday holatlar Hindistonda ko‘pincha o‘g‘il bolaga beriladigan ustunlik bilan bog‘liq. Qiz farzand ayrim oilalarda iqtisodiy yuk sifatida ko‘riladi. Huquq himoyachilari hisob-kitobiga ko‘ra, mamlakatda millionlab qizlar tug‘ilmasidan oldin abort orqali yo‘q qilingan yoki chaqaloq paytida o‘ldirilgan.
Qonunga ko‘ra, bola jinsini tug‘ilmasdan oldin aniqlash taqiqlangan bo‘lsa-da, yashirin klinikalar hali ham ishlayotgani aytiladi.
Eslatib o‘tamiz, 2019 yilda ham shunga o‘xshash holat sodir bo‘lgan — muddatidan oldin tug‘ilgan qizaloq sopol idishga solinib, tiriklayin ko‘milgan, ammo vaqtli qutqarib qolingan edi.
“Zamin”ni Telegramʻda oʻqing!
