Kamchatka yarimoroli yana bir bor tabiiy ofat bilan yuzma-yuz keldi. AQSH Geologiya xizmati ma’lumotlariga ko‘ra, 18 sentyabr kuni Petropavlovsk-Kamchatskiy shahri yaqinida 7,8 magnitudali zilzila qayd etildi. Ofat epitsentri shahardan taxminan 128 kilometr uzoqlikda, okean qa’rida 10 kilometr chuqurlikda joylashgan.
Zilziladan keyin Amerika meteorologlari ehtimoliy sunami xavfi haqida ogohlantirish berdi. Shundan so‘ng Kamchatka o‘lkasi gubernatori Vladimir Solodov barcha xizmatlar yuqori tayyorgarlik rejimiga o‘tkazilganini ma’lum qildi. Uning ta’kidlashicha, mahalliy seysmologlar magnitudani 7,2 deb baholagan va yarimorolning sharqiy sohilida sunami xavfi e’lon qilingan.
Hozircha qurbonlar yoki katta vayronagarchilik haqida ma’lumot kelib tushmadi. Biroq qutqaruvchilar jamoat binolari va turarjoy uylarini tezkor tarzda ko‘zdan kechirishni boshlagan. Mahalliy aholiga ehtiyot choralariga qat’iy amal qilish tavsiya etilmoqda.
Mutaxassislar ta’kidlashicha, Kamchatka tabiiy seysmik faol hudud bo‘lib, u yerdagi aholi har qanday favqulodda holatga tayyor holda yashashga majbur. Bunday kuchli zilzilalar nafaqat infratuzilmaga xavf tug‘diradi, balki odamlarning ruhiy holatiga ham kuchli ta’sir ko‘rsatadi.
Shu bois mahalliy hokimiyat organlari barcha ehtimoliy xavflarni oldini olish, aholini evakuatsiya qilish va qulay sharoit yaratish uchun barcha choralarni ko‘rayotganini ma’lum qildi.
“Zamin”ni Telegramʻda oʻqing!
