Dubay rekordlar poytaxti maqomini yana bir bor tasdiqladi: sayyoradagi eng baland mehmonxona Ciel Dubai Marina 2025 yilning noyabr oyida Birlashgan Arab Amirliklari (BAA)ning eng yirik shahrida ochiladi.
377 metr balandlikdagi bino nufuzli Dubai Marina tumanida joylashgan va amirlikning yangi me’moriy timsoliga aylanadi. U 356 metr balandlikdagi Shayx Zayd shossesidagi Gevora mehmonxonasidan o‘tib ketadi.
Mehmonxona NORR Group arxitektura studiyasi tomonidan loyihalashtirilgan va The First Group kompaniyasi tomonidan pudratchi China Railway 18th Bureau Group of Dubai ishtirokida qurilgan. Mehmonxona InterContinental Hotels Group (IHG) tarkibiga kiruvchi Vignette Collection brendi ostidagi The First Group Hospitality tomonidan boshqariladi.
Ciel Dubai Marina'ning o‘ziga xos xususiyatlari:
-
Fors ko‘rfazi panorama manzarasini taqdim etuvchi 82 qavat va 1004 xona va apartament;
-
noyob 12 qavatli atrium-bog‘;
-
taxminan 353 metr balandlikdagi restoran;
-
306 metr balandlikdagi suzish havzasi, u dunyodagi eng balandi bo‘ladi;
-
sakkizta restoran va bar;
-
Dubai Marina sohilbo‘yiga, suv taksilari, Dubai Marina Mall savdo markaziga, tramvay va metro bekatlariga to‘g‘ridan to‘g‘ri chiqish.
Ciel Dubai Marina «eng baland mehmonxona» unvonidan tashqari yana ikkita jahon rekordiga da’vogarlik qilmoqda: eng baland suzish havzasi va eng baland klub. Ochilishdan keyin Ginnesning rekordlar kitobi buni rasmiy tan olishi kutilmoqda.
Ciel Dubai Marina nafaqat sayyohlar uchun yangi joziba markaziga, balki Dubayning jahon me’morchiligidagi nufuzini yanada mustahkamlovchi ramziy inshootga aylanishi shubhasiz.
“Zamin”ni Telegramʻda oʻqing!
