Buyuk Britaniyada e’lon qilingan Good University Guide 2026 reytingi ilk bor tarixiy voqeaga guvoh bo‘ldi. 32 yil davomida doim yetakchi uchlikda joy olib kelgan Oksford va Kembridj universitetlari bu yil kuchli uchlikdan chiqib ketdi. Bu holat ta’lim dunyosida katta bahs va qiziqish uyg‘otdi.
Yangi yetakchilar
Reytingga ko‘ra, London Iqtisodiyot va Siyosat fanlari maktabi (LSE) ikkinchi yil ketma-ket birinchi o‘rinni egallashga muvaffaq bo‘ldi. Uning ortidan Sent-Endryus universiteti ikkinchi, Darem universiteti esa uchinchi o‘rinni qo‘lga kiritdi.
Shu bilan, Oksford va Kembridj kuchli to‘rt talikka kirish bilan cheklandi. Ilgari kamida bittasi har doim uchlikdan o‘rin olib kelgani bois bu yilgi natija tarixiy burilish sifatida qayd etildi.
Darem va LSEning yutuqlari
Darem universiteti bu yil “Yil universiteti” deb e’tirof etildi. LSE esa “Akademik samaradorlik bo‘yicha yilning eng yaxshi universiteti” hamda “Rassel guruhi universiteti” nominatsiyalarida g‘olib bo‘ldi. Bu natijalar mazkur muassasalarning ta’limdagi kuchli salohiyati va samaradorligini yana bir bor namoyon qildi.
Reyting mezonlari
Tuzilgan reytingda ta’lim sifati, talabalar tajribasi, ilmiy izlanishlar darajasi, barqarorlik ko‘rsatkichlari va bitiruvchilarning ishga joylashish imkoniyatlari inobatga olindi. Shu bilan birga, oliygohlar tomonidan taklif etilayotgan qo‘shimcha stipendiyalar, grantlar va talabalar uchun qulay shart-sharoitlar ham muhim mezon sifatida baholandi.
Mutaxassislar fikri
Tahlilchilarga ko‘ra, yetakchi universitetlarga kirish jarayoni yanada raqobatli bo‘lib bormoqda. Shu bilan birga, talabalarni uyga yaqinroq ta’lim olishni tanlashi ayrim universitetlar uchun yangi imkoniyatlar eshigini ochmoqda. Bu esa ta’lim tizimida yanada kuchli raqobat va yangi sharoitlarni yuzaga keltirishi kutilmoqda.
“Zamin”ni Telegramʻda oʻqing!
