Ispaniyalik mashhur rassom va haykaltarosh Pablo Pikassoning 80 yildan beri ommaga namoyish qilinmagan asari Parijdagi kimoshdi savdosiga qo‘yiladi. Bu haqda CNN xabar berdi.
Mazkur asar “Gulli qalpoqli ayol byusti” nomli kartina 1943 yilda Germaniya fashistlari tomonidan ishg‘ol qilingan Parijda yaratilgan. Asar Pikassoning o‘sha davrdagi iltifoti va sevgilisi Dora Maarning portreti hisoblanadi. Dora Maarning so‘nggi topilgan portretini 1944 yilda noma’lum kolleksioner xarid qilgan va o‘shandan beri uning oilasida saqlab kelinmoqda.
San’atshunos olim Anes Sevestr-Barbe bu asarni “juda katta tarixiy va badiiy ahamiyatga ega tuval” deb ta’riflaydi. Uning so‘zlariga ko‘ra, asar 80 yildan ortiq vaqt davomida omma ko‘z oldiga chiqmagan va hech qachon ko‘rgazma yoki kimoshdi savdosida namoyish qilinmagan.
Asar 81x60 sm o‘lchamda bo‘lib, yuqori chap burchakda Pikasso imzosi mavjud. Ushbu nodir kartina 24 oktyabr kuni Parij auksionda sotuvga qo‘yiladi. Boshlang‘ich bahosi 8 million yevro qilib belgilangan bo‘lib, mutaxassislar narxning yanada ko‘tarilishini kutmoqda.
Maar (aslida Genriyetta Teodora Markovich) fransuz syurrealist rassomi va fotografi bo‘lgan. Pikasso bilan romantik munosabatda bo‘lgan Dora Maarning bir necha portretlari yaratilgan: “Dora Maarning portreti”, “Yig‘layotgan ayol” va “Dora Maar mushuk bilan”. Maarning o‘zi bu portretlarning barchasi Pikassoga tegishli ekanini va hech biri haqiqatan Dora Maarga o‘xshamasligini ta’kidlaydi.
Ushbu auksion san’atshunoslar va kolleksionerlar uchun tarixiy ahamiyatga ega bo‘lgan voqea sifatida baholanmoqda va Pikassoning noma’lum asarlari haqidagi qiziqishni yanada oshirmoqda.
“Zamin”ni Telegramʻda oʻqing!
