AQSHdagi eng katta ijtimoiy tarmoqlardan biri hisoblangan TikTok atrofida muhim kelishuvga erishildi. Ma’lum qilinishicha, dasturning asosiy kompaniyasi ByteDance'dan ajratilishi yuzasidan yangi bitim imzolandi va uning Amerikadagi bo‘linmasi taxminan 14 milliard dollar qiymatda baholandi. Bu haqda Oq uy vitse-prezidenti J.D. Vens ma’lumot berdi.
Prezident Donald Tramp Oval ofisda farmon imzolab, kelishuv shartlarini yakunlash va amalga oshirish uchun 120 kunlik muddat belgiladi. Tahlilchilarga ko‘ra, bu qadam TikTok'ning AQSHdagi kelajagi uchun hal qiluvchi ahamiyatga ega.
Kelishuv shartlariga ko‘ra, Oracle korporatsiyasi, Silver Lake xususiy investitsiya fondi va Abu-Dabida joylashgan MGX suveren fondi TikTok'ning AQSHdagi 45 foiz aksiyalariga egalik qiladi. ByteDance o‘z qo‘lida 19,9 foiz ulushni saqlab qoladi, qolgan 35 foiz esa amerikalik investorlar o‘rtasida taqsimlanadi.
Oq uy tarqatgan ma’lumotda ta’kidlanishicha, yangi bitim TikTok'ning algoritmlari va kontentni nazorat qilish jarayonlarini qo‘shma korxona tasarrufiga o‘tkazadi. Shu bilan birga, Oracle ilovaning ma’lumot xavfsizligi va tavsiyalar tizimida asosiy boshqaruvchi sifatida qatnashadi. Maqsad – platformaning AQSH foydalanuvchilari uchun xavfsizligini ta’minlash va shaxsiy ma’lumotlarni himoya qilish.
Shuningdek, kelishuvda mashhur investorlar — Rupert Merdok va Maykl Dell ishtirok etgani ham qayd etilgan. TikTok hozirda AQSHda oyiga 170 milliondan ortiq faol foydalanuvchiga ega bo‘lib, mamlakatdagi eng ommabop platformalardan biri sifatida e’tirof etilmoqda.
Biroq kelishuvning xalqaro siyosiy tomoni ham yo‘q emas. U Xitoy bilan olib borilayotgan muzokaralar fonida amalga oshirildi. Prezident Tramp Si Tszinpin bilan muloqotini ijobiy baholab, kelishuvga Pekin ham rozilik berganini ta’kidladi. Shu bilan birga, ba’zi siyosatchilar bitim shartlari algoritm ustidan to‘liq nazorat bermasligidan xavotir bildirmoqda.
Mutaxassislar fikricha, ushbu kelishuv TikTok uchun yangi bosqichni boshlab berishi mumkin. U nafaqat bozordagi mavqeini mustahkamlaydi, balki AQSH va Xitoy o‘rtasidagi iqtisodiy munosabatlar taraqqiyotiga ham ta’sir ko‘rsatadi.
“Zamin”ni Telegramʻda oʻqing!
