AQSH prezidenti Donald Tramp navbatdagi tibbiy ko‘rikdan o‘tib, shifokorlar uning sog‘ligini “a’lo darajada” deb baholashdi. Uolter Rid milliy harbiy tibbiyot markazida o‘tkazilgan tekshiruvda davlat rahbarining yurak faoliyati yoshiga nisbatan “taxminan 14 yoshga yoshroq” ekani qayd etildi, deb xabar berdi CNN.
Ma’lumotlarga ko‘ra, Betesda shahrida o‘tkazilgan ko‘rik uch soat davom etgan. Prezident yillik profilaktik tekshiruvdan o‘tib, gripp va COVID-19 ga qarshi emlandi. Uning shaxsiy shifokori, AQSH dengiz floti kapitani Shon Barbabella ta’kidlashicha, tahlil natijalari Trampning yurak-qon tomir, o‘pka va asab tizimi faoliyati yuqori darajada ekanini ko‘rsatgan.
Shifokorning so‘zlariga ko‘ra, bu tekshiruv Trampning yaqinlashib kelayotgan xalqaro safarlari oldidan sog‘lig‘ini nazorat qilish maqsadida o‘tkazilgan. Ko‘rik chog‘ida keng qamrovli laboratoriya tahlillari, zamonaviy diagnostika va jismoniy tayyorgarlikni baholash testlari amalga oshirilgan.
Avvalroq Tramp o‘z sog‘ligi haqidagi turli mish-mishlarni inkor etgan edi. U jismoniy holati “yaxshi va barqaror” ekanini aytib, o‘zini a’lo kayfiyatda his qilayotganini ta’kidlagan.
Shon Barbabellaning qo‘shimcha ma’lumot berishicha, ilgari prezidentda surunkali venoz yetishmovchilik belgilari aniqlangan bo‘lsa-da, bu holat uning faoliyatiga ta’sir qilmayapti. Uning umumiy tibbiy ko‘rsatkichlari esa Trampni “yoshlarga xos energiya va barqarorlikka ega inson” sifatida tavsiflamoqda.
Shunday qilib, shifokorlar fikricha, AQSH prezidenti nafaqat siyosiy, balki jismoniy jihatdan ham yuqori formada qolmoqda — hatto yuragi yoshiga nisbatan 14 yoshga yoshroq ekan.
“Zamin”ni Telegramʻda oʻqing!
