Qirg‘izistonda yosh qiz bilan bog‘liq dahshatli jinoyat butun mamlakatni larzaga soldi. Issiqko‘l viloyatining Yetti-O‘g‘uz tumani, Barskaun qishlog‘ida yashovchi 17 yoshli Oysuluv ismli qiz shafqatsizlik bilan zo‘rlanib, keyin o‘ldirib ketilgan. Bu haqda “Turmush” nashri ma’lum qildi.
Ma’lumotlarga ko‘ra, fojia sentyabr oyining oxirlarida sodir bo‘lgan. Tushdan keyin Oysuluv dugonasi bilan uchrashish uchun uyidan chiqib, Qorako‘l shahriga yo‘l olgan. Yo‘lda unga “Honda Stream” rusumli mashina to‘xtagan — uning haydovchisi 1984 yilda tug‘ilgan, bir necha bor sudlangan erkak ekani keyin ma’lum bo‘lgan.
Yosh qiz dugonasiga yetib bormagan. Tergov ma’lumotlariga ko‘ra, erkak uni olma bog‘i tomonga olib borib zo‘rlagan, keyinchalik qilgan jinoyati fosh bo‘lishidan qo‘rqib, uni bo‘g‘ib o‘ldirgan. So‘ngra jasadni Kemin tumani hududiga tashlab ketgan va Bishkekka qochgan. Shu paytda u telefonini ham ataylab yo‘q qilgan.
Qizning qarindoshlari uni izlab, taxminan soat 19:30 da politsiyaga murojaat qilishgan. Ammo, afsuski, bu vaqtda qiz allaqachon hayotdan ko‘z yumgan bo‘lgan. Huquqni muhofaza qiluvchi organlar qisqa fursat ichida gumonlanuvchini qo‘lga olishga muvaffaq bo‘ldi.
Oysuluv 30 sentyabr kuni o‘z qishlog‘ida, yaqinlari va butun mahalla ahli ishtirokida dafn etilgan.
Politsiya ma’lumotlariga ko‘ra, jinoyatda 41 yoshli Bishkekda yashovchi erkak aybdor deb topilgan. U faqat zo‘rlash bilan cheklanmay, qizning joniga qasd qilgan. Tergov doirasida zarur ekspertizalar tayinlangan.
Marhumaning qarindoshlari aytishicha, dastlab politsiya ularning arizasini qabul qilishni kechiktirgan va “3 kun o‘tmaguncha izlash mumkin emas” degan. Biroq Ichki ishlar vazirligi xizmat tekshiruvi o‘tkazib, bu ma’lumotlar haqiqatga to‘g‘ri kelmasligini ma’lum qildi.
Hozirda tergov harakatlari davom etmoqda. Mahalliy jamoatchilik bu voqea bo‘yicha adolat talab qilmoqda va yosh qizning o‘limi mamlakatdagi zo‘ravonlikka qarshi kurashning jiddiy ahamiyat kasb etishi lozimligini yana bir bor eslatdi.
“Zamin”ni Telegramʻda oʻqing!
