Rossiya prezidenti Vladimir Putinning AQSH rahbari Donald Tramp bilan bo‘lajak uchrashuvi arafasida uning Budapeshtga parvoz qilish rejasi ma’lum bo‘ldi, deb yozdi Topnews.
Ma’lumotlarga ko‘ra, davlat rahbari Vengriya poytaxtiga maxsus Il-96-300PU samolyotida yo‘l oladi. Turkiya Tashqi ishlar vazirligi tasdiqlagan ma’lumotga ko‘ra, Putin samolyoti uchun parvoz yo‘nalishi allaqachon kelishilgan, ammo Yevropa Ittifoqi havo hududi bu yo‘ldan chiqarib tashlangan.
Putinning samolyoti Qora dengiz, O‘rtayer dengizi va Adriatik akvatoriyasi orqali, qisman Bosniya va Gersegovina hamda Serbiya hududlari ustidan o‘tadi. Umumiy yo‘l uzunligi taxminan 5 ming kilometrni tashkil etadi — bu Polsha va Ruminiya orqali o‘tishdan qariyb ikki baravar uzoq.
Bunday yo‘nalish tanlanishiga ikki asosiy sabab bor: Yevropa Ittifoqi havo hududidan foydalanishga joriy cheklovlar va xavfsizlik omillari. Manbalarga ko‘ra, 1-sonli samolyotni tutib olish yoki zarar yetkazish ehtimoli yuqori baholanmoqda.
Airlive portali yozishicha, xavfsizlikni ta’minlash maqsadida Putinning samolyotiga Suriyadagi Xmeymim aviabazasidan Rossiya qiruvchi samolyotlari — Su-35S va Su-30SMlar hamrohlik qiladi. Keyinroq eskortga Turkiyaning F-16, Serbiyaning MiG-29 va Vengriyaning JAS-39 Gripen havo kuchlari ham qo‘shiladi.
Boshqa ma’lumotlarga ko‘ra, ob-havo sharoitiga qarab yo‘nalishda qisman o‘zgarishlar kiritilishi mumkin.
Shu bilan birga, Davlat dumasi deputati Andrey Delyagin Telegramda Putinni Budapeshtga olib borishning “ertak variantlari”ni hazil tariqasida taklif qildi.
«Keling, faraz qilaylik — masalan, suborbital parvoz yoki shunchaki Tramp bilan bitta samolyotda uchish. Bu afsonaviy bo‘lardi», — deb yozdi u.
Shu bilan birga, deputat Vengriya hukumati Xalqaro jinoiy sud buyrug‘ini bajarish ehtimolini eslatib, Putinning tashrifi xavfsizlik nuqtayi nazaridan yuqori ehtiyotkorlikni talab qilishini ta’kidladi.
Putin va Trampning Budapeshtdagi uchrashuvi yaqin haftalarda bo‘lib o‘tishi kutilyapti. Uning asosiy mavzusi — Ukrainadagi vaziyat va Rossiya–AQSH munosabatlarining yangi bosqichi bo‘lishi mumkin.
“Zamin”ni Telegramʻda oʻqing!
