Qoraqalpog‘istonda jahon ilmiy hamjamiyatini hayratga solgan topilma aniqlandi — Sulton Uvays tog‘larida taxminan 75 million yil avval yashagan dinozavrning toshga aylangan suyak qoldiqlari topildi. Bu haqda O‘zbekiston Davlat geologiya muzeyi ma’lum qildi.
Ma’lumotlarga ko‘ra, qazilma tadqiqotlari Qoraqalpoq davlat universiteti va Geologiya muzeyi olimlari hamkorligidagi ekspeditsiya davomida amalga oshirilgan. Tekshiruvlar chog‘ida qadimgi yirtqich kaltakesakka tegishli bo‘lishi mumkin bo‘lgan suyak bo‘laklari — umurtqa qismlari, boldir suyagi va boshqa elementlar topilgan.
Geologiya muzeyi direktori Ahmadjon Ahmedshayevning ta’kidlashicha, ushbu suyaklar bo‘r davriga mansub bo‘lib, ularning aniq turi va ilmiy tasnifi xalqaro mutaxassislar ishtirokidagi laboratoriya tahlillaridan so‘ng e’lon qilinadi.
Hozirda noyob namunalar ilmiy laboratoriyalarda maxsus uskunalar yordamida o‘rganilmoqda. Tadqiqot natijalari dinozavrlar evolyutsiyasi va Markaziy Osiyo geologik tarixi bo‘yicha muhim ma’lumotlarni ochib berishi kutilmoqda.
Olimlar bu topilmani O‘zbekistondagi paleontologik izlanishlar uchun yangi bosqich deb baholamoqda.
“Zamin”ni Telegramʻda oʻqing!
