Ukraina prezidenti Vladimir Zelenskiy mamlakat hech qachon o‘z yerlarini Rossiyaga bermasligini qat’iy ta’kidladi, deb xabar berdi mahalliy OAV. Uning so‘zlariga ko‘ra, Ukraina hududi faqat ukrain xalqiga tegishli bo‘lib, uning bir qarich qismi ham “bosqinchiga sovg‘a qilinmaydi”.
“Ukrainlar hech kimga yer bermaydi. Biz bosqinchiga hech narsa sovg‘a qilmaymiz. Bu haqdagi javob Konstitutsiyada aniq yozilgan — hech kim undan chetga chiqa olmaydi”, — dedi Zelenskiy mamlakat televideniyesidagi murojaatida.
Prezident bu fikrlarni AQSHning sobiq rahbari Donald Tramp va Rossiya prezidenti Vladimir Putin o‘rtasida Ukraina ishtirokisiz o‘tgan ehtimoliy muzokaralar fonida bildirdi. U bu kabi kelishuvlarni “huquqiy kuchga ega bo‘lmagan” va “yangi urush xatarini kuchaytiradigan” harakat sifatida baholadi.
Zelenskiyning ta’kidlashicha, urushni tugatish kerak, lekin buni Ukraina emas, Rossiya amalga oshirishi lozim. “Biz o‘z yerimiz uchun kurashishni to‘xtatmaymiz”, — dedi u.
Shuningdek, davlat rahbari Ukraina hududiy yaxlitligi hech qachon muzokara mavzusi bo‘lmasligini, har qanday kelishuv mamlakat ishtirokisiz qabul qilinsa, u haqiqiy tinchlikka olib kelmasligini qo‘shimcha qildi.
“Zamin”ni Telegramʻda oʻqing!
