Buyuk Britaniyada qamoq tizimida yirik xato fosh bo‘ldi — bir yil ichida 260 dan ziyod mahkum noqonuniy ravishda ozod etilgan. Bu haqda “Sky News” telekanali hukumat statistikasiga tayanib xabar berdi.
Ma’lumotlarga ko‘ra, 2024 yil martidan 2025 yil martigacha bo‘lgan davrda 233 kishi qamoqxonalardan, yana 29 nafar mahkum esa sud zallaridan xatolik sabab chiqarilgan. Bu o‘tgan yilga nisbatan 128 foizga ko‘p ko‘rsatkich hisoblanadi.
Fojiali holat efiopiyalik muhojir Xadush Kebatu ishidan keyin jamoatchilik e’tiboriga tushdi. U jinsiy jinoyat uchun hukm qilinganiga qaramay, deportatsiya jarayonida adashib ozod etilgan va keyin qochib ketgan. Keyinchalik uning Londonda ekani ma’lum bo‘lgan.
Kebatuning 14 yoshli qiz va bir ayolga nisbatan qilgan harakatlari ortidan Britaniya bo‘ylab norozilik namoyishlari boshlangan. Fuqarolar hukumatdan muhojirlarni mehmonxonalarda joylashtirish amaliyotini to‘xtatishni talab qilmoqda.
Hozirda mamlakat bo‘ylab 210 ta mehmonxonada 32 mingga yaqin noqonuniy muhojir yashamoqda. “The Times” ma’lumotiga ko‘ra, bu tizim britaniyalik soliq to‘lovchilarga yiliga taxminan 4 milliard funt sterlingga tushmoqda. Hukumat 2029 yilgacha bu amaliyotni to‘liq bekor qilishni va’da bergan.
Mutaxassislar ta’kidlashicha, qamoqxona tizimidagi xatolik nafaqat byurokratik yetishmovchilik, balki mamlakatdagi muhojirlar siyosatidagi jiddiy muammolarni ham ochib berdi.
“Zamin”ni Telegramʻda oʻqing!
