Hindistonning Andxra Pradesh shtatida joylashgan Srikakulam shahridagi ibodatxonada diniy marosim paytida yuz bergan tiqilinch butun mamlakatni larzaga soldi, deb xabar berdi Hindustan Times.
Marosimda yuzlab odamlar yig‘ilgani aytilmoqda. Ammo ibodatxonadan chiqish paytida odam oqimi teskari yo‘nalishda harakatlana boshlagan va shiddat bilan kirib kelganlar chiqmoqchi bo‘lganlarni bosib ketgan.
Rasmiy ma’lumotlarga ko‘ra, kamida o‘n nafar inson halok bo‘lgan, ularning ko‘pchiligi ayollar va bolalar ekani qayd etilgan. Yana bir necha kishi og‘ir jarohatlar bilan shifoxonaga yetkazilgan, ayrimlarining ahvoli og‘ir.
Hodisa sabablari bo‘yicha tergov boshlangan. Mahalliy hokimiyat va qutqaruv xizmati xodimlari holatni nazoratga olgan.
Hindistonda bunday fojealar so‘nggi yillarda tez-tez kuzatilmoqda. Muttaxassislar bunga odam oqimini to‘g‘ri boshqarmaslik, tor infratuzilma va xavfsizlik qoidalariga yetarlicha amal qilinmasligini sabab sifatida ko‘rsatmoqda.
Fojeadan so‘ng mamlakatda ommaviy yig‘ilishlarda xavfsizlikni kuchaytirish haqida bahslar yana avj oldi.
“Zamin”ni Telegramʻda oʻqing!
