Xitoyning Shenzhou-20 missiyasi doirasida orbitada xizmat qilayotgan uch nafar astronavt Yerga qaytishi kutilganidan kechiktirildi, deb xabar berdi mahalliy ommaviy axborot vositalari.
Ma’lumotlarga ko‘ra, ularni olib kelish uchun mo‘ljallangan qaytish kapsulasi kosmik chiqindilar bilan to‘qnashgan bo‘lishi mumkin. Shu sababli parvoz boshqaruv markazi xavfsizlikni birinchi o‘ringa qo‘yib, qo‘shimcha tekshiruvlar o‘tkazishga qaror qilgan.
Diagnostika jarayonida kapsula yuzasida ehtimoliy shikastlanishlar aniqlanib, issiqlikdan himoya qoplamasi hamda boshqaruv tizimlari qayta tekshirilmoqda.
Tiangong stansiyasida xizmat qilayotgan astronavtlar — Chen Dun, Chen Junjuy va Van Sze — hozircha orbitada qolmoqdalar va o‘z vazifalarini bajarishda davom etmoqda. Rasmiy ma’lumotlarga ko‘ra, ularning hayoti yoki sog‘lig‘i uchun xavf yo‘q.
Mutahassislar ta’kidlashicha, orbitadagi asosiy muammolardan biri — kosmik chiqindilar hisoblanadi. Ular sputniklar va raketa bo‘laklari, buzilgan qurilmalar qoldiqlari yoki hatto millimetr o‘lchamdagi metall parchalardan iborat bo‘lib, ulkan tezlikda harakat qiladi. Birgina shunday zarba ham kapsulaning muhofaza qoplamasini yorib o‘tishi yoki uning qaytish tizimini ishdan chiqarishi mumkin.
Hozirda muhandislar vaziyatni to‘liq nazoratda ushlab turibdi. Barcha texnik diagnostika yakunlangach, Shenzhou-20 ekipajining Yerga qaytish vaqti aniqlanishi kutilmoqda.
“Zamin”ni Telegramʻda oʻqing!
