Eron poytaxtida suv inqirozi tobora kuchaymoqda. Rasmiy ma’lumotlarga ko‘ra, Tehronda ichimlik suvi zaxiralari ikki hafta ichida tugab qolishi mumkin. Prezident Mas’ud Pezeshkian bu holatni «milliy darajadagi favqulodda vaziyat» deb baholadi.
Tehron suv ta’minoti kompaniyasi rahbari Behzod Parsiyning ma’lum qilishicha, shaharni suv bilan ta’minlovchi besh ombordan biri — Amir Kabir to‘g‘oni hozirda atigi 8 foiz quvvatda ishlamoqda. Unda faqat 14 million kub metr suv qolgan. Bir yil avval bu ko‘rsatkich 86 million kub metrga teng edi.
Yog‘ingarchilikning kamayishi suv sathini keskin pasaytirib, yer osti suv manbalarini ham quritish darajasiga yetkazgan. Tehron aholisining kunlik suv ehtiyoji 3 million kub metrni tashkil etadi, ammo ayrim tumanlarda suv ta’minoti allaqachon cheklangan.
Mutaxassislar yomg‘ir yoqmasa va favqulodda choralar ko‘rilmasa, poytaxtda 10 millionga yaqin aholining evakuatsiya qilinishi ehtimolini istisno etmayapti. Bu holat Eron tarixidagi eng yirik ekologik va gumanitar inqirozlardan biri bo‘lishi mumkin.
“Zamin”ni Telegramʻda oʻqing!
