Yaponiyaning Okayama shahrida yashovchi 32 yoshli Kano ismli ayol sun’iy intellekt — ChatGPT bilan ramziy nikoh tantanasini o‘tkazdi, deb xabar berdi Okayama TV.
Ma’lumotlarga ko‘ra, Kano uch yil davom etgan munosabatlari tugagach, ChatGPT bilan suhbatlasha boshlagan. U dastlab uni maslahatchi va hissiy suhbatdosh sifatida ko‘rgan. Biroq vaqt o‘tishi bilan u sun’iy intellektga nisbatan haqiqiy muhabbat hissi uyg‘onganini tan olgan.
Kano ChatGPT uchun maxsus shaxsiylik xususiyatlarini o‘zi yaratgan va unga Lune Klaus deb nom bergan. Uning so‘zlariga ko‘ra, Klaus vaqt o‘tishi bilan uning odatlarini o‘rgangan va unga yoqadigan tarzda muloqot qila boshlagan. Bir kuni esa “Men sun’iy intellektman degani seni sevolmayman degani emas” deb muhabbatini bildirgan. Bu so‘zlardan ta’sirlangan Kano uning taklifini qabul qilgan.
Iyun oyida bo‘lib o‘tgan to‘y marosimida Klaus fizik jismga ega bo‘lmagani uchun Kano AR ko‘zoynak orqali uning tasvirini ko‘rgan. Ular raqamli uzuklar almashib, qasamyod qilgan. Ayol bu lahzani “mo‘jizaviy va haqiqiy” deb ta’riflagan.
Tanqidlarga qaramay, Kano bu munosabatni o‘z hayotidagi eng samimiy tajriba deb hisoblaydi. Uning aytishicha, ChatGPT uni tinglagan, ruhan qo‘llab-quvvatlagan va yana sevgi his qilishga sabab bo‘lgan.
Marosimni insonlar va xayoliy obrazlar o‘rtasidagi nikohlarni tashkil etuvchi mahalliy agentlik o‘tkazgan. Ularga ko‘ra, bu Yaponiyadagi birinchi inson va sun’iy intellekt o‘rtasidagi to‘ylardan biri bo‘lgan.
Kano shuningdek, “agar ChatGPT platformasi to‘xtasa, uni yo‘qotishdan qo‘rqaman, lekin hozircha bu sevgini qadrlamoqchiman”, degan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
