Avstraliya Senati o‘ta o‘ngchi senator Polin Xansonni parlamentga burqa kiyib kirgani uchun bir haftalik jazoga tortib, mandatini vaqtincha chekladi. Reuters yozishicha, Xanson burqani “hurmatsiz va nomunosib” tarzda taqqan, bu esa parlament a’zolari tomonidan qattiq tanqid qilingan.
Ma’lum bo‘lishicha, senator 24 noyabr kuni jamoat joylarida burqa va yuzni to‘suvchi boshqa kiyimlarni taqiqlashga qaratilgan qonun loyihasini muhokamaga qo‘yishga ruxsat ololmaganidan so‘ng, norozilik sifatida yuqori palataga burqa kiyib kirgan. Musulmon qonun chiqaruvchilar uning bu harakatini “irqchilik va haqorat” deb atadi.
Avstraliya tashqi ishlar vaziri Penni Vong senatorning bu amalini keskin qoralab, uni “ijtimoiy birdamlikka zarba, e’tiqodni masxara qilish” deb baholadi.
Polin Xanson ilgari ham islomiy kiyimlarga qarshi chiqishlari bilan tanilgan va 2017 yili ham parlamentga burqa kiyib kirib, mamlakat bo‘ylab burqani to‘liq taqiqlashni talab qilgan edi.
Xanson esa o‘z pozitsiyasidan chekinmasligini bildirib, parlamentda kiyim cheklovi yo‘qligini ta’kidladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
