Hindistonning turli hududlarida ilgari oddiy o‘sadigan kapalak no‘xati guli bugun fermerlar uchun daromad manbaiga aylanmoqda. Ko‘k rangli bu gul choy, tabiiy bo‘yoq va oziq-ovqat mahsulotlarida keng qo‘llanilmoqda. Assam shtatida yashovchi Nilam Brahma ham shu gulni yetishtirish orqali kichik biznes boshlagan va qisqa vaqt ichida daromad ko‘ra boshlaganini aytadi.
So‘nggi yillarda dunyoda tabiiy rang beruvchi mahsulotlarga talab oshgani kapalak no‘xatiga bo‘lgan qiziqishni kuchaytirdi. AQShda ushbu gul oziq-ovqat qo‘shimchasi sifatida tasdiqlangan bo‘lsa-da, Yevropa va Buyuk Britaniyada u hali to‘liq ruxsat etilmagan. Shunga qaramay, hind tadbirkorlari bu mahsulot kelajagi bor deb hisoblab, fermerlar bilan hamkorlikni kengaytirmoqda.
Hindistondagi ayrim kompaniyalar fermerlarga urug‘, texnik maslahat va barqaror xarid shartnomalarini taklif qilmoqda. Gulni to‘g‘ri uzish va past haroratda quritish muhim jarayon hisoblanadi. Bu ishda asosan ayollar faol ishtirok etmoqda, chunki nozik gullarni shikastlamasdan terish katta e’tibor talab qiladi.
Mutaxassislar kapalak no‘xati guli sog‘liq uchun ham foydali bo‘lishi mumkinligini ta’kidlashmoqda. Ayrim tadqiqotlar uning qondagi shakar miqdorini nazorat qilishga yordam berishini ko‘rsatgan. Natijada bu gul nafaqat fermerlar daromadini oshirmoqda, balki qishloq joylarda yangi hamkorlik va biznes tarmoqlarini shakllantirishga xizmat qilmoqda.
“Zamin”ni Telegramʻda oʻqing!
