Qozog‘istonda diniy-ma’rifiy sohada sun’iy intellektdan foydalanish bo‘yicha yangi tashabbus muhokamaga chiqdi. Qozog‘iston Musulmonlari diniy boshqarmasi diniy savollarga javob berishga mo‘ljallangan “Imom AI” nomli mobil ilovani ishlab chiqish va joriy etishni rejalashtirayotganini ma’lum qildi.
Orda.kz nashriga ko‘ra, Qozog‘iston Oliy muftiysi Nauryzbay hoji Taganuli mazkur ilova 2026 yilda ishga tushirilishi ko‘zda tutilayotganini aytgan. Ta’kidlanishicha, “Imom AI” ishonchli diniy manbalarga tayanib, foydalanuvchilar murojaatlariga tezkor va aniq javob berish imkonini yaratishi kutilmoqda.
Bayonotda keltirilishicha, zamonaviy sharoitda diniy sohada ham raqamli yechimlarni yo‘lga qo‘yish muhim. Loyiha fuqarolarga diniy masalalar bo‘yicha qulay va ishonchli ma’lumot olishni osonlashtirishi, shu bilan birga imomlar va ruhoniylar zimmasidagi kundalik yuklamani ham yengillashtirishi mumkin.
Eslatib o‘tamiz, Qozog‘iston Prezidenti Qosim-Jomart To‘qayev Yangi yil munosabati bilan qilgan murojaatida 2026 yilni raqamlashtirish va sun’iy intellekt infratuzilmasini rivojlantirish yili deb e’lon qilgan edi. Prezident fikricha, ilg‘or texnologiyalarni joriy etish mamlakat salohiyatini turli yo‘nalishlarda oshirishga xizmat qiladi.
Qayd etish joiz, avvalroq O‘zbekiston Musulmonlar idorasi sun’iy intellektdan diniy savol so‘rash masalasiga nisbatan o‘z pozitsiyasini bildirgan edi.
“Zamin”ni Telegramʻda oʻqing!
