Checheniston rahbari oilasiga tegishli ko‘chmas mulklar haqidagi yangi ma’lumotlar jamoatchilikda qizg‘in muhokamalarga sabab bo‘lmoqda. Sizib chiqqan rasmiy reyestr hujjatlariga tayanilgan holda, Grozniy shahri markazida joylashgan qimmatbaho uylar rahbarning voyaga yetmagan o‘g‘illariga tegishli ekani ma’lum qilindi.
Ma’lumotlarga ko‘ra, Checheniston rahbarining 9 yoshli o‘g‘li Abdullaga umumiy maydoni 2 ming kvadrat metrdan ortiq bo‘lgan hashamatli uy va 4 ming kvadrat metr yer uchastkasi rasmiylashtirilgan. Ushbu ko‘chmas mulkning qiymati taxminan 800 million rublga, ya’ni 10 million dollardan ortiq summaga baholanmoqda. Aytilishicha, mazkur bino rahbar qarorgohidan bor-yo‘g‘i 300 metr masofada joylashgan.
Qayd etilishicha, dastlab ushbu yer va uy rahbarning o‘zi tomonidan ijaraga olingan, keyinchalik esa mulk o‘g‘li nomiga o‘tkazilgan. 2023 yilda, Abdulla 7 yosh bo‘lgan paytda, ushbu mulk xususiylashtirilgan. Biroq tahlilchilarga ko‘ra, bolaning bu darajadagi ko‘chmas mulkni sotib olish uchun mustaqil moliyaviy imkoniyati bo‘lmagan.
Reyestr ma’lumotlarida shu hududda rahbarning yana bir o‘g‘li — 19 yoshli Aliga tegishli qimmatbaho uy va yer uchastkasi ham qayd etilgan. Ushbu ko‘chmas mulkning qiymati taxminan 500 million rublga baholanadi. Ma’lum qilinishicha, Ali ushbu uyni 2024 yil fevral oyida xarid qilgan.
Shuningdek, rahbarning 18 yoshli yana bir o‘g‘li Adamga ham Grozniy markazida joylashgan, to‘rt qavatli va 2 ming kvadrat metr maydonga ega hashamatli uy tegishli ekani aytilmoqda. Ushbu mulkning bozor qiymati taxminan 750 million rublni tashkil etadi.
Nashrlar ta’kidlashicha, mazkur ma’lumotlar jamoatchilikda rahbar oilasining moliyaviy imkoniyatlari va ko‘chmas mulk masalalari bo‘yicha yangi savollarni o‘rtaga chiqarmoqda.
“Zamin”ni Telegramʻda oʻqing!
